వరదనీటిలో చిక్కుకొని 24 గంటలు చెట్టుపైనే.. చివరికి ఇలా బయటకు!

స్నేహితులతో కలిసి నదిలో చేపల వేటకు వెళ్లాడు. ఇంతలో ఎగువ నుంచి వరద ప్రవాహం పెరగడంతో డ్యామ్ గేట్లు ఎత్తి నీటిని కిందికి వదిలారు. చూస్తుండగానే వరద ప్రవాహం ముంచెత్తింది. స్నేహితులు ఎలాగోలా తప్పించుకున్నారు గానీ.. అతడు మాత్రం వరదలో చిక్కుకుపోయాడు. ఇక ప్రాణాలు పోయినట్టే అనుకున్న దశలో ఓ చెట్టు కనిపించింది. వేగంగా వెళ్లి దానిపైకెక్కి నిల్చున్నాడు. రాత్రంతా ఆ చెట్టు పైనే ఉన్నాడు. 24 గంటల తర్వాత ఎన్డీఆర్‌ఎఫ్ సిబ్బంది హెలికాప్టర్‌లో వచ్చి ఆ యువకుడిని రక్షించారు. మధ్యప్రదేశ్‌లోని చింద్వారా జిల్లాలో ఈ ఘటన చోటు చేసుకుంది.

చింద్వారా జిల్లా బెల్ఖేడా గ్రామానికి చెందిన మధు కహర్‌ అనే వ్యక్తి తన మిత్రులతో కలిసి చేపల వేటకు వెళ్లాడు. భారీ వర్షాల నేపథ్యంలో పెంచ్‌ నదిపై ఉన్న మచగొరా ప్రాజెక్టు వద్ద వరద నీరు భారీగా చేరింది. దీంతో అధికారులు గేట్లు ఎత్తివేశారు. దిగువన ఒక్కసారిగా నీటి మట్టం పెరిగింది.

దిక్కుతోచని అక్కడే ఉన్న ఓ చెట్టు పైకి ఎక్కి కూర్చున్న మధు కహర్.. తనను కాపాడటానికి ఎవరైనా వస్తారని చూశాడు. ఇదే సమయంలో వరద ప్రవాహం అంతకంతకూ పెరిగిందే గానీ.. ఏమాత్రం తగ్గలేదు. స్థానికులు ఏం చేయలేకపోయారు. దీంతో రాత్రంతా అతడు చెట్టుపై నిస్సహాయ స్థితిలో అలాగే ఉండిపోయాడు.

స్థానికుల ద్వారా విషయం తెలుసుకున్న అధికారులు ఎన్డీఆర్‌ఎఫ్ సిబ్బందికి సమాచారం అందించారు. శనివారం (ఆగస్టు 29) ఉదయం ఎన్డీఆర్‌ఎఫ్‌ సిబ్బంది అతడిని క్షేమంగా తీసుకొచ్చారు. హెలికాప్టర్‌లో వెళ్లి తాడు సాయంతో అతడిని పైకి లాగి బయటకు తీసుకొచ్చారు.

మరోవైపు.. మధ్యప్రదేశ్‌లో భారీ వర్షాలు కురిసే అవకాశం ఉందని వాతావరణ శాఖ హెచ్చరికలు జారీ చేసింది. 10 జిల్లాలకు ఆరెంజ్ అలర్ట్ ప్రకటించారు. మధ్యప్రదేశ్‌లో వారం రోజులుగా భారీ వర్షాలు కురుస్తున్నాయి. ముఖ్యమంత్రి శివరాజ్‌సింగ్‌ చౌహాన్‌ వరద ప్రభావిత ప్రాంతాల్లో ఏరియల్‌ సర్వే నిర్వహించారు.

Also Read: బాలుడిని కాపాడి ప్రాణం విడిచిన అనాథ.. కంటతడి పెట్టించే ఘటన

Video: అప్పగింతల వేళ ప్రియుడి ఎంట్రీ.. షాకిచ్చిన వధువు