పకోడి బిజినెస్‌కు సాయం కావాలి.. కుర్రాడి లేఖతో షాక్

ప్రధాని మోడీ ఇచ్చిన పకోడి సలహా నిరుద్యోగులకు తెగ నచ్చేసినట్లుంది. వ్యాపారం పెట్టుకుంటామంటూ రంగంలోకి దిగేస్తున్నారు. అయితే బిజెనెస్ కోసం సాయం చేయాలంటూ ఏకంగా నేతలకు లేఖలు రాసేస్తున్నారు. ఉత్తరప్రదేశ్‌కు చెందిన ఓ కుర్రాడు రాసిన లేఖ ఇప్పుడు హాట్‌టాపిక్‌గా మారింది. అమేథికి చెందిన అశ్విన్ మిశ్రా తన సమస్యల్ని ప్రస్తావిస్తూ... ఉద్యోగం తనకెంత అవసరమో చెబుతూనే... పకోడి వ్యాపారిని సాయం చేయాలంటూ కేంద్రమంత్రి స్మృతి ఇరానీతో పాటూ స్థానిక నేత మోసిన్ రాజాకు పంపించారు. ఆ లేఖ నిరుద్యోగుల ఆవేదనను కూడా తెలియజేసే ప్రయత్నం చేసినట్లు కనిపిస్తోంది.

అశ్విన్ లేఖలో ప్రస్తావించిన అంశాలు వింటే కాస్త నవ్వు తెప్పించడమే కాదు... అతడు పడుతున్న బాధ కూడా బయటకు తెలుస్తోంది. జాబ్ కోసం వెతికి... వెతికి అలసిపోయానన్నాడు అశ్విన్. ఈ మధ్యే ప్రధాని గారి ఇంటర్వ్యూ చూశానని... అందులో నిరుద్యోగులకు ఇచ్చిన సలహాను ప్రస్తావించారు. ఈ సలహా తనను ఎంతో ఆకట్టుకుందని... ఇలా చేస్తే తన కుటుంబాన్ని పోషించడమే కాక... మరో ఇద్దరు ముగ్గురికి కూడా ఉపాధి కల్పించవచ్చన్నారు. అయితే వ్యాపారం మొదలు పెట్టేంత ఆర్థిక స్థోమత తనకు లేదన్నారు. అంతేకాదు లోన్ కోసం బ్యాంకులు చుట్టూ తిరిగానని... కాని ఎవరూ ఇవ్వలేదన్నారు.



ప్రధాన మంత్రి ముద్ర యోజన కిందైనా తనకు లోన్ ఇవ్వాలని అడిగారు. మోడీ ఇచ్చిన సలహా తప్పుకాదని తాను అనుకుంటున్నానని... సలహా ఇచ్చినట్లే లోన్ ఇవ్వాలని బ్యాంకుల్ని సూచించాలన్నారు. ఈ లేఖను ప్రస్తావిస్తూ బీజేపీపై కాంగ్రెస్ కౌంటర్లు ఇచ్చింది. బీజేపీ చేస్తున్న పాలన ఎలా ఉందో అర్థం చేసుకోవచ్చని... ఇదే ఓ ఉదాహరణ మాత్రమేనని సెటైర్ వేశారు.