నాయక్ కోసం తీగ లాగితే, పాక్‌లో దావూద్ వరకు డొంక కదులుతోంది

జకీర్ నాయక్ నేతృత్వంలోని ఇస్లామిక్ రిసెర్చ్ ఫౌండేషెన్‌(ఐఆర్ఎఫ్)లోకి సాగిన నిధుల ధన ప్రవాహంపై విచారణ చేపట్టిన ఎన్‌ఫోర్స్‌మెంట్ డైరెక్టరేట్‌‌కి ఎన్నో ఆసక్తికరమైన వాస్తవాలు తెలుస్తున్నాయి. కరాచీ కేంద్రంగా సాగుతున్న హవాలా రాకెట్ దందాలో జకీర్ నాయక్ పాత్ర కూడా వుందా అనే అనుమానాలు కలుగుతున్నాయి. పాకిస్థాన్‌లో తల దాచుకుంటున్న మాఫియా డాన్ దావూద్ నేతృత్వంలోని డీ కంపెనీతోపాటు దావూద్ సన్నిహితమిత్రులతో నాయక్‌కి సంబంధాలున్నాయా అనే సందేహాలు కలుగుతున్నాయి.

సామాజిక సేవా సంస్థ వేషంలో వున్న ఓ ఉగ్రవాద సంస్థ జకీర్ నాయక్ ఆధ్వర్యంలోని ఇస్లామిక్ రిసెర్చ్ ఫౌండేషన్‌కి నిధులు సమకూర్చుతుండటం అందుకు కారణంగా తెలుస్తోంది. జకీర్ నాయక్ వద్ద చీఫ్ ఫైనాన్షియల్ ఆఫీసర్ (సీఎఫ్ఓ)గా పనిచేస్తున్న ఆమీర్ గజ్దర్‌ని అరెస్ట్ చేసిన మూడు రోజుల తర్వాత ఎన్‌ఫోర్స్‌మెంట్ డైరెక్టరేట్ అధికారులు తమ దర్యాప్తులో తెలుసుకున్న ఆసక్తికరమైన అంశాలివి.

పాక్‌లో దావూద్‌తో సన్నిహిత సంబంధాలు కలిగిన కొంతమంది కరాచీకి చెందిన వ్యాపారవేత్తలపై ఇప్పుడు ఈడీ ఓ కన్నేసింది. వీరి సంస్థల నుంచే నాయక్ నడిపిస్తున్న ఐఆర్ఎఫ్‌లోకి భారీ మొత్తంలో నిధులు ప్రవహించాయి. పాకిస్థాన్, దుబాయ్‌ల నుంచి భారీ మొత్తంలో అందిన మొత్తాలను డీల్ చేసింది ఈ ఆమీర్ గజ్దరేనని భావిస్తున్న పోలీసులు అతడి వద్ద నుంచి మరింత సమాచారాన్ని రాబట్టేందుకు ప్రయత్నిస్తున్నారు.