కాలిఫోర్నియా గవర్నర్ రేసులో 22 ఏళ్ల భారతీయ అమెరికన్..!

అమెరికాలో భారత కీర్తి పతాకను ఎగరేసేందుకు మరో భారతీయ అమెరికన్ సిద్ధమయ్యాడు. 22 ఏళ్ల ఐటీ నిపుణుడు శుభమ్ గోయల్ కాలిఫోర్నియా గవర్నర్ పదవి కోసం పోటీ పడుతున్నాడు. మొత్తం 27 మంది గవర్నర్‌ పదవి కోసం పోటీ పడుతుండగా.. వారందరిలోనూ అతిపిన్న వయస్కుడైన శుభమ్‌ వినూత్న ప్రచారంతో ఎన్నికల ప్రచారంలో దూసుకుపోతున్నాడు. ఉత్తరప్రదేశ్ మూలాలున్న శుభమ్ మెగాఫోన్ పట్టుకుని కాలిఫోర్నియా వీధుల్లో నిర్వహిస్తున్న ప్రచారం అందరినీ ఆకర్షిస్తోంది. ఐటీలో తనకున్న నైపుణ్యాన్ని ఇందుకోసం ఉపయోగించుకుంటున్నాడు. 'వర్చువల్ రియాలిటీ టెక్నాలజీ'ని ఉపయోగిస్తూ ప్రజలను విశేషంగా ఆకర్షిస్తున్నాడు.

శుభమ్ తల్లి కరుణ గోయల్ మీరట్‌కు చెందిన వారు కాగా, తండ్రి విపుల్ గోయల్‌కు లక్నోలో సొంత సాఫ్ట్‌వేర్ కంపెనీ ఉంది. శుభమ్ కాలిఫోర్నియాలో యూనివర్సిటీ నుంచి ఎకనమిక్స్‌లో డిగ్రీ పొందాడు. గతేడాది అక్టోబరు విర్చువల్‌ రియాలిటీ కంపెనీలో మేనేజర్‌గా విధులు నిర్వర్తిస్తూ కాలిఫోర్నియాలోని డాన్‌విల్లెలో నివాసం ఉంటున్నాడు. అయితే గవర్నర్‌గా పోటీ పడుతున్న నేపథ్యంలో వినూత్న ప్రచారానికి తెరతీశాడు. డెమొక్రటిక్ గవర్నర్ జెర్రీ బ్రౌన్ కంటే తానెంత మెరుగైన వ్యక్తినో చెబుతూ ఓటర్లను ఆకర్షించే ప్రయత్నం చేస్తున్నాడు.

'కాలిఫోర్నియాలోనే పుట్టి పెరిగాను. టెక్నాలజీలో వస్తున్న నూతన ఆవిష్కరణలను ప్రజల సమస్యల పరిష్కారంలో వాడొచ్చు. నాకు తెలిసి ఎన్నికల ప్రచారంలో వర్చువల్‌ రియాలిటీని వాడుతున్న మొదటి వ్యక్తిని నేనే అనుకుంటా. బాహ్య ప్రపంచం రోజు రోజుకూ కొత్త ఆవిష్కరణలతో దూసుకుపోతూంటే, రాజకీయాల్లో మాత్రం అవేవి కనిపించటంలేదు' అని శుభమ్‌ గోయల్‌ అంటున్నాడు.

సామాజికమాధ్యమాల సహాయంతోనే కాకుండా, నగరంలోని వీధుల్లోనూ అతను మైక్ పట్టుకుని తనను గెలిపించాలంటూ ప్రచారం చేస్తున్నారు. ఎన్నికల్లో డబ్బు ప్రభావాన్ని సమూలంగా నిర్మూలించి, టెక్నాలజీని ఎక్కువగా వాడాలసిన సమయం ఆసన్నమైందన్నారు. రాజకీయాల్లో స్వతంత్రంగా, స్వేచ్ఛగా మాట్లాడేవారి అవసరం ఉందన్నారు. టెక్నాలజీతో పాలనలో పారదర్శకత ఉండేలా చూడొచ్చని అన్నారు.