Bangladesh ఆలయానికి వెళ్తుండగా పడవ ప్రమాదం: 23 మంది జల సమాధి.. పదుల సంఖ్యలో గల్లంతు

పడవ ప్రయాణం విషాదంగా మారి 20 మందికిపైగా ప్రాణాలు కోల్పోయిన ఘటన బంగ్లాదేశ్‌లో (Bangladesh) ఆదివారం సంభవించింది. కరటోయా నదిలో (Karatoya river) పడవ బోల్తా (Boat Capsizes) పడి 23 మంది మృతి చెందగా, పలువురు గల్లంతు అయ్యారు. బంగ్లాదేశ్‌ రాజధాని ఢాకాకు (Dhaka) 468 కిలోమీటర్ల దూరంలో ఉత్తర పంచగఢ్‌ జిల్లాలోని ఈ ప్రమాదం చోటుచేసుకుంది. ప్రమాద సమయానికి పడవలో 100 మంది వరకూ ఉన్నట్లు సమాచారం. అయితే, మృతుల సంఖ్య ఇంకా పెరిగే అవకాశం ఉందని ఉత్తర పంచగఢ్ పోలీసులు తెలిపారు. ప్రమాదం గురించి తెలిసిన వెంటనే హుటాహుటీనసహాయక బృందాలతో పోలీసులకు అక్కడికి చేరుకున్నారు.సహాయక చర్యలు చేపట్టి.. ప్రయాణికులను కాపాడే ప్రయత్నం చేస్తున్నారు. ఇప్పటి వరకు బయటకు తీసిన మృతదేహాల్లో చిన్నారులు, మహిళలు ఉన్నారని ఉత్తర పంచగఢ్‌ జిల్లా పాలనాధికారి జహురుల్‌ ఇస్లాం వెల్లడించారు. గల్లంతైన వారి కోసం సహాయక చర్యలు కొనసాగుతున్నాయని ఆయన పేర్కొన్నారు. అయితే, ఎంత మంది గల్లంతయ్యారనేది స్పష్టత లేదని అన్నారు. 70 మంది వరకూ ఉంటారని స్థానికులు చెబుతున్నారు. స్థానిక కాలమాన ప్రమాదం ఆదివారం మధ్యాహ్నం 1.30 గంటల సమయంలో ప్రమాదం జరిగింది.

బోడా పోలీస్ స్టేషన్ ఇంఛార్జి సుజోయ్ కుమార్ రాయ్ మాట్లాడుతూ.. బోరోసొషిలో ఉన్న హిందూ ఆలయానికి వెళ్తుండగా కరటోనియా నదిలోని అవాలియా ఘాట్ వద్ద ఈ ప్రమాదం చోటుచేసుకుందని తెలిపారు. మహాలయ అమావాస్య కావడంతో ఆలయంలో పూజలకు కోసం వెళ్తున్నవారే పడవలో ఎక్కువగా ఉన్నారని చెప్పారు.

కాగా, బంగ్లాదేశ్‌లో ఏటా పడవ ప్రమాదాల్లో వందలాది మంది ప్రాణాలు కోల్పోతున్నారు. లోతట్టు ప్రాంతం కావడంతో జల మార్గాలపైనే ఎక్కువగా ఆధారపడుతుంటారు. కానీ, సరైన భద్రతా ప్రమాణాలు పాటించపోవడంతో ప్రమాదాలు నిత్యకృత్యమైపోయాయి. ఈ ఏడాది మే నెలలో పద్మ (గంగ) నదిలో ఇసుకతో నిండిన బల్క్‌ క్వారియర్‌ను స్పీడ్ బోటు ఢీకొన్న ఘటనలో 26 మంది మృతి చెందారు