చర్చిలో కాల్పులు.. 26 మంది మృతి

అమెరికాలో మరోసారి విషాదం చోటు చేసుకుంది. టెక్సాస్‌లో ఓ చర్చిలో ఆదివారం (నవంబర్ 5) ప్రార్థనలు జరుగుతున్న సమయంలో ఓ దుండగుడు విచక్షణరహితంగా కాల్పులకు పాల్పడ్డాడు. దీంతో 26 మంది ప్రాణాలు కోల్పోయారు. మరో 20 మందికి పైగా గాయపడ్డారు. గాయపడ్డ వారిలో కొంత మంది పరిస్థితి విషమంగా ఉంది. సదర్‌లాండ్‌ స్ప్రింగ్స్‌లోని ఫస్ట్‌ బాప్టిస్ట్‌ చర్చిలో సుమారు 50 మంది ప్రార్థనలు చేస్తుండగా.. చర్చిలోకి వచ్చిన దుండగుడు విచక్షణారహితంగా కాల్పులు జరిపాడు. ఆ ఆగంతుకుడు నల్లటి దుస్తుల్లో ఉన్నట్లు ప్రత్యక్ష సాక్షులు తెలిపారు.

ఓ స్థానిక వ్యక్తి అత్యంత సాహసోపేతంగా అతణ్ని అడ్డుకోవడంతో కొందరి ప్రాణాలు దక్కాయి. కాల్పులకు పాల్పడిన తర్వాత పారిపోతున్న దుందగుణ్ని భద్రతా సిబ్బంది మట్టుబెట్టారు. దుండగుడు గతంలో అమెరికన్‌ ఎయిర్‌ఫోర్స్‌లో పని చేసిన కెల్లీగా అధికారులు గుర్తించారు.