56 ఏళ్ల వయస్సులో ప్రసవం... సొంత కొడుకు బిడ్డకే జన్మనిచ్చిన తల్లి.. అయినా నానమ్మే..!

సెలబ్రిటీల పుణ్యమా అని సరోగసి విధానం గురించి అందరికి బాగా తెలిసింది. దీనిపై చర్చలు కూడా సాగుతున్నాయి. ఈ పద్ధతిలో పిల్లల్ని కనడంపై వివాదం కూడా అవుతుంది. ఈ విధానంలో పిల్లలను కనడానికి సంబంధించి... తాజాగా అమెరికాలో అబ్బురపోయే ఘటన చోటుచేసుకుంది. అది తెలుసుకుంటే ఆశ్చర్యపోకుండా ఉండలేరు. ఓ 56 ఏళ్ల మహిళ తన కొడుకు, కోడలి కోసం సరోగసి పద్ధతిలో ఐదో బిడ్డకు జన్మనిచ్చింది. ఉతహ్‌ ప్రాంతంలో నివాసం ఉండే జెఫ్‌ హౌక్‌‌, కేంబ్రియా దంపతులకు నలుగురు పిల్లలున్నారు. అయినా వారు మరో బిడ్డ కావాలనుకున్నారు. అయితే కొన్ని కారణాల వల్ల కేంబ్రియా గర్భం తీసేయాల్సి వచ్చింది. దాంతో ఆమె మరో బిడ్డను కనే అవకాశం లేకపోయింది. దాంతో ఇతర మార్గాల్లో బిడ్డను పొందేందుకు ప్రయత్నించారు. వారి కష్టం ఫలించలేదు. అలాంటి సమయంలో జెఫ్‌ తల్లి 56ఏళ్ల నాన్సీ హౌక్‌ వారికి ఓ సలహా ఇచ్చింది. సరోగసి విధానంలో ఐదో బిడ్డను కని వారికి ఇస్తానని చెప్పింది.


దీనికి మొదట నాన్సీ కొడుకు, కోడలు ఒప్పుకోలేదు. అసలు ఏ మాత్రం అంగీకరించలేదు. అయితే వారిని ఎలాగోలా ఆమె ఒప్పించింది. చివరికి సొంత కొడుకు, కోడలి ఐదో బిడ్డకు నాన్సీ జన్మనిచ్చింది. ఆ పాపకు హన్హ అని పేరు కూడా పెట్టారు. ఈ విషయాన్ని కేంబ్రియా ఇన్‌స్టాగ్రామ్‌ ద్వారా వెల్లడించింది. ఈ సందర్భంగా నాన్సీ బేబీ బంప్‌ ఫొటోలను సైతం షేర్ చేసింది. ఇలా సొంత కొడుకు బిడ్డనే అతని తల్లి కనడం చాలా విడ్డూరంగా ఉంది. ఈ వార్త, ఫొటోలు సోషల్‌ మీడియాలో ట్రెండింగ్‌లో ఉన్నాయి. చాలామంది ఈ విషయం తెలుసుకుని తెగ ఆశ్చర్యపోతున్నారు. సొంత కొడుకు బిడ్డను అతని తల్లే కనడం.. చాలా విచిత్రంగా అనిపిస్తుంది.