ఆ పేరెత్తితేనే అమెరికన్లలో చావు భయం కనిపిస్తోంది!

తిండి కలిగితే కండ కలదోయ్, కండ కలవాడే మనిషోయ్ అన్నాడో మహాకవి. మరి ఆ తిండి ఎక్కువై, లావెక్కి ప్రాణభయంతో గజ గజా వణికిపోతున్నారు అమెరికన్లు. క్యాన్సర్‌తో సమానంగా వారు ఒబేసిటీకి భయపడుతున్నారని ఓ పోల్‌లో తేలింది. ఒబేసిటీ అనేది చాలా తీవ్రమైన ఆరోగ్య సమస్యని, దీనికి క్యాన్సర్లతో దగ్గరి సంబంధాలు ఉన్నాయని 81 శాతం మంది అమెరికన్లు భావిస్తున్నారు. డయాబెటీస్, గుండె జబ్బులు, మానసిక సమస్యలు, ఎయిడ్స్ కంటే అధికంగా వారిప్పుడు ఒబేసిటీ అంటేనే హడలిపోతున్నారు. ఇతర ఆరోగ్య సమస్యలేవీ లేకపోయినప్పటికీ అతిగా లావెక్కిపోవడం వల్ల త్వరగా మరణించే ముప్పు తలెత్తుతోందని దాదాపు 94 శాతం మంది అమెరికన్లు ఆందోళన చెందుతున్నారు.

ప్రతి ముగ్గురు అమెరికన్లలో ఒకరు ఒబేసిటీ కారణంగా ఇబ్బందులు పడుతున్నారు. గతంలో కంటే ఎక్కువగా ఈ సమస్య గురించి వారిలో అవగాహన పెరిగింది. కానీ బరువు తగ్గే విషయం చర్చించేందుకు వారు డాక్టర్లను సంప్రదించడం లేదని ఈ పోల్‌లో తేలింది. 60 శాతం మంది అమెరికన్లు లావు తగ్గేందుకు ప్రయత్నిస్తున్నారు. సరైన ఆహారం తీసుకోవడంతోపాటు ఎక్సర్‌సైజ్ చేయడం వల్ల దీర్ఘకాలంలో బరువు తగ్గించుకోలగమనే విశ్వాసాన్ని 78 శాతం మంది వ్యక్తం చేశారు. బరువు తగ్గించుకునే శస్త్ర చికిత్సలు, మందులు వాడటం కంటే కూడా ఇదే ఉత్తమ మార్గమమని వారు భావిస్తున్నారు.