భర్త తోడు లేకుండా షాపింగ్‌కి వెళ్లిందని తల నరికేశారు

ఆఫ్ఘనిస్తాన్‌లో తాలిబన్ల అరాచకాలకు అడ్డూఅదుపులేకుండా పోయింది. తాజాగా ఓ మహిళ తన భర్త కానీ లేదా మరొక మగ తోడు కానీ లేకుండా ఒంటరిగా షాపింగ్‌కి వెళ్లిందన్న ఆగ్రహంతో తాలిబన్లు ఆమె తల నరికేయడమే అందుకు మరో నిదర్శనం. ది ఇండిపెండెంట్ ప్రచురించిన ఓ వార్తా కథనం ప్రకారం సోమవారం సాయంత్రం ఆఫ్ఘనిస్తాన్‌లోని సరేపుల్ ప్రావిన్స్‌లో ఈ ఘటన చోటుచేసుకుంది.

సరేపుల్ ప్రావిన్స్‌లోని లటి గ్రామం ప్రస్తుతం తాలిబన్ల ఆధీనంలో వుంది. ఇక్కడి మహిళలపై వున్న ఆంక్షలు అన్నీ ఇన్ని కావు. కుటుంబంలోని మగవారి తోడు లేకుండా మహిళలు ఎవ్వరూ గడప దాటి బయటికి వెళ్లకూడదు అనే నియమం కూడా ఆ ఆంక్షల్లో ఒకటి. అయితే, సోమవారం ఓ 30 ఏళ్ల మహిళ ఆ ఆంక్షల్ని అతిక్రమించిందనే ఆగ్రహంతో తాలిబన్లు ఆమె తలనరికారు. ఆమె భర్త ప్రస్తుతం ఇరాన్‌లో వున్నాడని, వారికి సంతానం లేదని అధికారులు తెలిపారు. తాలిబన్ల అరాచకాలతో ఆఫ్ఘనిస్తాన్‌లో మహిళలకు ప్రాథమిక హక్కులు, స్వేచ్ఛ కల్పించాలన్న ప్రభుత్వ లక్ష్యం నెరవేరే పరిస్థితులు కనిపించడంలేదు.