ఇజ్రాయెల్ ప్రధాని సహాయకురాలికి కరోనా పాజిటివ్

కరోనా వైరస్ సామాన్య ప్రజలనే కాదు దేశాల అధినేతలను సైతం వణికిస్తోంది. బ్రిటన్ ప్రధాని బోరిస్ జాన్సన్ కోవిడ్ బారిన పడగా.. ఆరోగ్య శాఖ మంత్రి కరోనా బారిన పడగా.. కెనడా ప్రధాని భార్య ఇటీవల కోవిడ్ నుంచి కోలుకున్నారు. తాజాగా ఇజ్రాయెల్ ప్రధాని బెంజమిన్ నెతన్యాహూ సలహాదారు రివ్కా పాలౌచ్‌‌కు కూడా కరోనా పాజిటివ్ అని తేలింది. ఈ విషయాన్ని ఇజ్రాయెల్ స్థానిక మీడియా వెల్లడించింది. గత కొద్ది రోజులుగా పాలౌచ్ ప్రధానితోపాటు ఇజ్రాయెల్ పార్లమెంట్ సభ్యులు, సలహాదారులతో సమయం గడిపాడని మీడియా తెలిపింది.

పాలౌచ్‌ భర్త ముందుగా కోవిడ్ బారిన పడగా.. ఆయన నుంచి ఆమె ఇన్ఫెక్షన్ బారిన పడ్డారు. పాలౌచ్‌‌కు పాజిటివ్ అని తేలిన తర్వాత నెతన్యాహూ రెండోసారి కరోనావైరస్ పరీక్షలు చేయించుకోనున్నారు. నెతన్యాహూ‌ను క్వారంటైన్లో ఉంచాల్సిన అవసరం లేదని ప్రధాని కార్యాలయం తెలిపింది.

ఇప్పటి వరకూ ఇజ్రాయెల్‌లో 4300 మంది కరోనా బారిన పడగా 16 మంది ప్రాణాలు కోల్పోయారు. కరోనా బారిన పడిన వారిలో 80 మంది పరిస్థితి విషమంగా ఉందని ఆరోగ్య శాఖ ప్రకటించింది. 139 మంది కోలుకున్నారని తెలిపింది. కరోనాను కట్టడి చేయడం కోసం ఇజ్రాయెల్ వ్యాప్తంగా స్కూళ్లను మూసివేశారు. పది మంది కంటే ఎక్కువ మంది గుమికూడటంపై నిషేధం విధించారు.