US Results: ట్రంప్, బిడెన్ ఇద్దరికీ అవకాశాలు.. కీలకంగా మారిన జార్జియా

యావత్ ప్రపంచం ఆసక్తిగా ఎదురుచూస్తున్న అమెరికా ఎన్నికల ఓట్ల లెక్కింపు కొనసాగుతూనే ఉంది. డొనాల్డ్ ట్రంప్, జో బిడెన్ హోరాహోరీగా తలపడటంతో ఫలితంపై ఉత్కంఠ కొనసాగుతోంది. భారత కాలమానం ప్రకారం గురువారం (నవంబర్ 5) మధ్యాహ్నం 12 గంటల వరకు అందిన వివరాల ప్రకారం.. డెమొక్రాటిక్‌ నేత జో బిడెన్‌‌కు 264 ఎలక్టోరల్ ఓట్లు దక్కాయి. డొనాల్డ్ ట్రంప్‌కు 214 ఎలక్టోరల్ ఓట్లు దక్కాయి.

అంటే.. అధికారానికి జో బిడెన్ కేవలం 6 ఎలక్టోరల్ ఓట్ల దూరంలో ఉన్నారు. ఫలితాలు తేలాల్సిన ఏ ఒక్క రాష్ట్రంలో (అలస్కా మినహా) ఆయనకు ఆధిక్యం వచ్చినా అమెరికా అధ్యక్ష పీఠం ఆయనదే. ఇదే సమయంలో డొనాల్డ్ ట్రంప్‌ విజయావకాశాలను కొట్టిపారేయట్లేదు విశ్లేషకులు. ఈ నేపథ్యంలో జార్జియా, అరిజోనా ఎన్నికల ఫలితాలు కీలకం కానున్నాయి.

పెద్ద రాష్ట్రాల్లో ఒకటైన జార్జియాకు 16 ఎలక్టోరల్ ఓట్లు ఉన్నాయి. ఇక్కడ ఇప్పటికే 98 శాతం కౌంటింగ్ పూర్తయ్యింది. వీటిలో ట్రంప్‌ దాదాపు 27 వేల (0.4 శాతం) ఆధిక్యంలో ఉన్నారు. మరో 2 శాతం ఓట్లు మాత్రమే లెక్కించాల్సి ఉంది. వీటిలో ఎవరికి స్వల్ప ఆధిక్యం వచ్చినా ఆ 16 ఎలక్టోరల్‌ ఓట్లు వారికే దక్కుతాయి. ఈ నేపథ్యంలో జార్జియా ఫలితం ఇద్దరు నేతలకు కీలకంగా మారింది. మరో రాష్ట్రం అరిజోనాలోనూ ఇదే రకమైన పరిస్థితి ఉంది.

ఒకవేళ జార్జియాలో ట్రంప్‌కు ఆధిక్యం దక్కితే ఆ 16 ఎలక్టోరల్‌ ఓట్లు ఆయనకే లభిస్తే తుది ఫలితం మరింత ఉత్కంఠగా మారే అవకాశం ఉంది. స్వింగ్‌ స్టేట్స్‌‌లో కీలకమైన ఉత్తర కరోలినా (15), పెన్సిల్వేనియా (20)లో డొనాల్డ్ ట్రంప్‌ ఆధిక్యంలో ఉన్నారు. వీటితో పాటు నెవడాలోనూ ట్రంప్ ఆధిక్యం పొందగలిగితే ఆయనకు కూడా గెలుపు అవకాశాలుంటాయి.

Also Read: ఈ ముందస్తు సంకేతాల ప్రకారం జో బిడెన్‌దే గెలుపు!

Don't Miss: వుహాన్ వెళ్లిన విమానంలో 19 మంది భారతీయులకు కరోనా