అమెరికాలో కరోనా విలయం.. 20 లక్షలు దాటిన కేసులు, త్వరలో 2 లక్షల మరణాలు

అగ్రరాజ్యం అమెరికాలో కరోనా మహమ్మారి విలయతాండవం చేస్తోంది. తాజాగా ఆ దేశంలో కరోనా పాజిటివ్‌ కేసుల సంఖ్య 20 లక్షలు దాటింది. అమెరికాలో ఇప్పటివరకు 20,00,464 పాజిటివ్‌ కేసులు నిర్ధారణ అయినట్లు జాన్స్ హాప్కిన్స్‌ యూనివర్సిటీ గురువారం (జూన్ 11) తెలిపింది. కరోనా కారణంగా యూఎస్‌లో ఇప్పటివరకు 1,12,924 మంది మృతి చెందినట్లు పేర్కొంది.

అమెరికాలో సెప్టెంబర్ నాటికి 2 లక్షల మరణాలు సంభవించవచ్చని ఇండో అమెరికన్ ప్రొఫెసర్, హార్వర్డ్ గ్లోబల్ హెల్త్ వర్సిటీ డైరెక్టర్ ఆశిష్ ఝా పేర్కొన్నారు. కరోనా మహమ్మారి గుప్పిట నుంచి అమెరికా ఇప్పట్లో బయటపడే అవకాశాలు కనిపించడంలేదని ఆయన వ్యాఖ్యానించారు. కరోనా దాటికి అక్కడ రోజుకు సరాసరి 800 నుంచి వెయ్యి మంది మరణిస్తున్నారని ఆయన తెలిపారు.

కొవిడ్‌-19తో అమెరికా తీవ్ర ముప్పు ఎదుర్కొంటోంది. వైరస్ ఉధృతి కొనసాగుతుండగానే.. ఇటీవల అధ్యక్షుడు డొనాల్డ్ ట్రంప్ ఆంక్షలు సడలించారు. మరోవైపు నల్లజాతీయుడు జార్జ్‌ ఫ్లాయిడ్‌ మృతితో అమెరికా వ్యాప్తంగా నిరసనలు భగ్గుమన్నాయి. ఈ నేపథ్యంలో వైరస్‌ వ్యాప్తి మరింత పెరిగే ప్రమాదం ఉందని నిపుణులు ఇప్పటికే ఆ దేశాన్ని హెచ్చరించారు.

అమెరికా తర్వాత అత్యధికంగా కరోనా కేసులు బ్రెజిల్‌లో నమోదవుతున్నాయి. 7.72 లక్షల కేసులతో బ్రెజిల్ రెండో స్థానంలో ఉంది. 4.93 లక్షల కేసులతో రష్యా మూడో స్థానంలో ఉంది. గురువారం (జూన్ 11) సాయంత్రం నాటికి 2,93,754 కేసులతో భారత్ నాలుగో స్థానానికి ఎగబాకడం గమనార్హం. 2,91,588 కేసులతో నాలుగో స్థానంలో ఉన్న బ్రిటన్‌ను అధిగమించింది. భారత్ మే 24న టాప్ 10 జాబితాలోకి చేరగా.. కేవలం 18 రోజుల్లోనే నాలుగో స్థానానికి ఎగబాకడం గమనార్హం.

Also Read: చైనా సరిహద్దులో వ్యూహాత్మక రోడ్లు.. హెలికాప్టర్లతో భారీ యంత్రాల తరలింపు

Must Read: రాత్రికి రాత్రే రంగు మారిన 56 వేల ఏళ్ల లోనార్ సరస్సు.. ఆసక్తికర వివరాలు