అమెరికా కన్నెర్రజేస్తే ఎవరైనా వణకాల్సిందే!

అమెరికా, ఉత్తర కొరియా మధ్య పచ్చగడ్డి వేస్తే భగ్గుమంటోంది. గత ఆరేడు మాసాలుగా ఇరు దేశాల మధ్య మాటాల యుద్ధం కొనసాగుతోంది. ఒకరిపై ఒకరు తీవ్ర వ్యాఖ్యలు చేస్తే ఉద్రిక్తతలను కొనసాగిస్తున్నారు. తాము అమెరికాను భస్మం చేస్తామని ఉత్తర కొరియా అంటుంటే, పిల్లకాకి ఏం తెలుగు ఉండేలు దెబ్బ అంటూ అగ్రరాజ్యం ఘీంకరిస్తోంది. అమెరికా హెచ్చరికలను పెడచెవిన పెడుతూ ఉత్తర కొరియా వరుసగా క్షిపణి పరీక్షలు నిర్వహిస్తోంది. తాజాగా అమెరికాను భయపెట్టడానికి ఉత్తర కొరియా చేసే ప్రయత్నాలు రానున్న రోజుల్లో మరింత పెరుగుతాయని వైట్ హౌస్ సిబ్బంది వ్యవహారాల మాజీ కార్యదర్శి లియోన్ పెన్నేటా వ్యాఖ్యానించారు. అయితే, ఉత్తర కొరియా బెదిరింపులకు తాము తలొగ్గమని... అమెరికా కన్నెర్ర చేస్తే ప్రపంచంలోని ఏ దేశానికైనా వణుకు పుడుతుందని ఆయన అన్నారు.

ఒకే నెలలో రెండు అణు క్షిపణులను పరీక్షించిన ఉత్తర కొరియా ఇంతటితో ఆగుతుందని తాను భావించడం లేదని పేర్కొన్నారు. ఎంతో ఆధునిక సాంకేతిక పరిఙ్ఙానం ఉంటేనే ఓ చిన్న దేశం అమెరికాతో తలపడేందుకు సిద్ధపడుతుందని ఉత్తర కొరియాను ఉద్దేశించి వ్యాఖ్యలు చేశారు. ఉత్తర కొరియా వెనుక చైనా హస్తం ఉన్న మాట నిజమే అయినా... ఆ దేశం ఎన్నాళ్లు సహాయం చేస్తుందని ప్రశ్నించారు. చైనా ప్రయోజనాలకు భంగం కలగనంత వరకే ఈ రెండు దేశాల మధ్య సంబంధాలు కొనసాగుతాయని జోస్యం చెప్పారు. అమెరికాతో యుద్ధం చేయమంటూ ఉత్తర కొరియాను ప్రోత్సహిస్తున్న చైనా.. తీరా ఆ సమయానికి మొహం చాటేసి, వెన్ను చూపుతుందని ఎద్దేవా చేశారు.