ట్రంప్‌కు మళ్లీ హ్యాండిచ్చిన మెలానియా

అమెరికా ప్రెసిడెంట్‌కు భార్య మెలానియా మళ్లీ షాకిచ్చింది. తన చేతిని పట్టుకునేందుకు ప్రయత్నించిన ట్రంప్‌ను పక్కకు తోసేశారు. దీనికి సంబంధించిన వీడియో సోషల్ మీడియాలో వైరలవుతోంది. ఓహియో వెళ్లేందుకు ఇద్దరు కలిసి హెలీప్యాడ్ దగ్గరకు నడుచుకుంటూ వచ్చారు. లాంగ్ కోట్‌తో కనిపించిన మెలానియా... తన చేతుల్ని లోపల ఉంచుకున్నారు. ఇది గమనించని ట్రంప్... ఆమె చేతిని పట్టుకునేందుకు ప్రయత్నించారు. కాని అందకపోవడంతో కాస్త తడబడిపోయారు. ఈ సీన్‌ మొత్తాన్ని కవర్ చేసుకునేందుకు ఆయన పడ్డ పాట్లు అన్నీ ఇన్నీ కావు.

జరిగిన వ్యవహారాన్ని కవర్ చేసుకునేందుకు మెలానియాతో కొద్దిసేపు అక్కడే నిలబడిపోయారు. మళ్లీ ఆమె భుజంపై చేయి వేసి విమానం దగ్గరకు వెళ్లారు. ఆ సమయంలో మెలానియా కాస్త ఇబ్బందిగా ఫీలైనట్లు కనిపించారు. ఇలాంటి ఘటనే గతేడాది సౌదీ పర్యటనకు వెళ్లిన సమయంలో జరిగింది. అక్కడ కూడా విమానం దిగి కిందికి దిగే సమయంలో ఆమె చేతిని పట్టుకొని నడిచే ప్రయత్నం చేశాడు. కాని ఆమె తిరస్కరించారు. దీన్ని కవర్ చేసుకునేందుకు ట్రంప్ తంటాలు పడ్డారు. ఆ వీడియో కూడా అప్పట్లో వైరల్‌గా మారింది.