ఒబామా ముద్దు... ట్రంప్ వద్దంటున్న అమెరికన్లు!

అధ్యక్షుడి బాధ్యతలు చేపట్టిన రెండు వారల్లోనే డోనాల్డ్ ట్రంప్ పట్ల తీవ్ర వ్యతిరేకత వ్యక్తమవుతోంది. వివాదస్పద నిర్ణయాలతో ప్రపంచ దేశాల నుంచే కాదు అమెరికన్ల నుంచి కూడా ట్రంప్ విమర్శలు ఎదుర్కొంటున్నారు. అమెరికా అధ్యక్షుడిగా బాధ్యతలు చేపట్టిన తర్వాత ఏడు ముస్లిం దేశాలపై నిషేధం విధించడం, హెచ్-1 బి వీసా నిబంధనలను కఠినతరం చేస్తూ చట్టం తీసుకురావడానికి ప్రయత్నించడంతో అతడిని అభిశంసించాలన్న డిమాండ్‌కు మద్దతు పెరుగుతోంది.

కేవలం వారం రోజుల వ్యవధిలోనే ఆయనపై వ్యతిరేకత 5 శాతం పెరగడం గమనార్హం. బారక్ ఒబామాను మళ్లీ అధ్యక్షుడిగా మెజార్టీ అమెరికా పౌరులు కోరుకుంటున్నట్లు పబ్లిక్ పాలసీ సర్వేలో వెల్లడైంది. ఒబామా హయాంలోనే పరిస్థితులు బాగున్నాయని 52 శాతం మంది అభిప్రాయపడగా, ట్రంప్ పనితీరుపై కేవలం 43 శాతం మంది మాత్రమే సంతృప్తి వ్యక్తం చేశారు.

ట్రంప్‌ పట్ల వ్యతిరేకత గతవారం 35 శాతం ఉండగా, తాజా సర్వేలో 40 శాతానికి చేరుకుంది. సాధారణంగా బాధ్యతలు స్వీకరించిన కొత్త అధ్యక్షుడి పట్ల ప్రజలు సానుకూలంగా ఉంటారు, కానీ ఇక్కడ మాత్రం తీవ్ర వ్యతిరేకత వ్యక్తం చేయడం విశేషం. కేవలం 48 శాతం మంది మాత్రమే ట్రంప్ అభిశంసనను వ్యతిరేకిస్తున్నారని సర్వే పేర్కొంది.