అల్జీమర్స్‌పై పరిశోధనలకు గేట్స్ భూరి విరాళం

మైక్రోసాఫ్ట్ సహ-వ్యవస్థాపకుడు బిల్ గేట్స్ అల్జీమర్స్ (మతిమరుపు) వ్యాధిపై పరిశోధనకు వ్యక్తిగతంగా మరో 50 మిలియన్ డాలర్లు విరాళం ఇస్తున్నట్లు ప్రకటించారు. వెంచర్ క్యాపిటల్ ఫండ్ కింద అల్టీమర్స్‌పై పరిశోధనకు ప్రభుత్వంతో కలిసి పనిచేయడానికి ఈ నిధులు వెచ్చించనున్నట్లు తెలిపారు. ప్రస్తుతం అల్జీమర్స్ వ్యాధిపై పరిశోధనకు బిల్ మిలిండా గేట్స్ ఫౌండేషన్ తరఫున అందజేస్తోన్న 50 మిలియన్ డాలర్లకు ఇది అదనమని, వాటితో సంబంధం లేదని గేట్ తెలియజేశారు. నానాటికీ అల్జీమర్స్ వ్యాధిగ్రస్తులు అనూహ్యంగా పెరుగుతున్నారని, దీని వల్ల ఆర్థిక, భావోద్వేగ సమస్యలను ఎదుర్కొంటున్నారని రాయిటర్స్ పత్రికకు ఇచ్చిన ఇంటర్వ్యూలో ఆయన పేర్కొన్నారు.

ఇది చాలా పెద్ద సమస్యని, రోజు రోజుకూ దీని ప్రభావం అధికమవుతోందని ఆవేదన వ్యక్తం చేశారు. దశాబ్దాలుగా పరిశోధనలు సాగిస్తున్నా, సరైన చికిత్స విధానం కనుక్కోలేకపోతున్నారని, ప్రస్తుతం ఉన్న ఔషధాలు కూడా అంత ప్రభావం చూపలేకపోతున్నాయని బిల్ గేట్స్ అన్నారు. పరిశోధనలకు అవసరమైన నిధులు సమకూర్చితే త్వరలోనే అల్జీమర్స్‌కు సరైన చికిత్సా విధానం అందుబాటులోకి వస్తుందనే ఆశాభావం వ్యక్తం చేశారు. రాబోయే పదేళ్లలో శక్తివంతమైన ఔషధాలు కనుగొన్నా, లక్ష్యాన్ని చేరుకోవడం కష్టమని గేట్స్ తెలిపారు. ఇది విజయవంతమవడానికి సుమారు పదేళ్లు పడుతుందని అన్నారు.

అల్జీమర్స్ సర్వసాధారణమైపోయింది... ప్రస్తుతం ప్రపంచ వ్యాప్తంగా సుమారు 50 మిలియన్లగా ఉన్న వీరి సంఖ్య 2050 నాటికి 131 మిలియన్లకు చేరుకుంటుందని ఓ స్వచ్ఛంద సంస్థ నివేదిక తెలిపింది. మిలిండా గేట్స్ ఫౌండేషన్ ద్వారా నిరుపేద దేశాల్లోని సంక్రమిత వ్యాధి బాధితులకు సేవలు అందిస్తున్నారు. గేట్ ప్రయత్నాన్ని అల్జీమర్స్ సొసైటీ చారిటీ సీఈఓ జెర్మీ హ్యుగ్స్ స్వాగతించారు. త్వరగా నిర్ణయాన్ని అమలు చేసి, అల్టీమర్స్ వ్యాధి అరికట్టడానికి ప్రయత్నించాలని ఆయన కోరారు.