విమానం క్రాష్ ల్యాండింగ్.. ఆరుగురికి గాయాలు

వరుస ప్రమాదాలు విమాన ప్రయాణికులను భయబ్రాంతులకు గురిచేస్తున్నాయి. శుక్రవారం 126 మంది ప్రయాణికులతో వెళ్తున్న ఫ్లై జమైకా ఎయిర్‌వేస్ బోయింగ్ జెట్‌లైనర్ విమానం గుయానా రాజధాని జార్జ్ టౌన్‌లో క్రాష్ ల్యాండైంది. ఈ ఘటనలో ఆరుగురు గాయపడ్డారు. విమానంలో హైడ్రాలిక్ సమస్య ఏర్పడటం వల్లే ఈ ప్రమాదం జరిగినట్లు తెలిసింది.

టొరంటో నుంచి బయల్దేరిన బోయింగ్ 757 విమానం తెల్లవారుజాము 2.10 గంటలకు విమానాశ్రయంలో ల్యాండవుతున్న సమయంలో హైడ్రాలిక్ వ్యవస్థ మొరాయించింది. పైలట్ ఈ విషయాన్ని విమానాశ్రయ సిబ్బందికి తెలియజేయడంతో అంతా అప్రమత్తం అయ్యారు. విమాన ల్యాండింగ్ సమయంలో రన్‌వేను బలంగా తాకడంతో విమానంలో భారీ కుదుపులు ఏర్పడ్డాయి. దీంతో ఆరుగురు గాయపడ్డారు. అయితే, ఎవరికీ తీవ్ర గాయాలు కాలేదని అధికారులు తెలిపారు.