గిల్గిత్-బల్టిస్థాన్ భారత్‌లో భాగం: బ్రిటన్ పార్లమెంట్

లండన్: పీఓకేలోని గిల్గిత్-బల్టిస్థాన్ ప్రాంతాన్ని ఐదో ప్రావిన్సుగా ఏర్పాటు చేయనున్నట్లు పాక్ చేసిన ప్రకటనను బ్రిటిష్ పార్లమెంట్ ఖండించింది. పాక్ ఆక్రమిత కశ్మీర్ పట్ల పాకిస్థాన్ అజమాయిషీని తిరస్కరిస్తూ బ్రిటిష్ పార్లమెంట్ ఓ తీర్మానాన్ని ఆమోదించింది. గిల్గిత్ బల్టిస్థాన్ ప్రాంతం రాజ్యాంగబద్ధంగా జమ్మూ కశ్మీర్లో భాగమని, దాన్ని అక్రమంగా పాకిస్థాన్ ఆక్రమించిందని పార్లమెంట్ సభ్యులు తీర్మానం చేశారు.

మార్చి 23న కన్జర్వేటివ్ పార్టీకి చెందిన బాబ్ బ్లాక్‌మ్యాన్ ఈ బిల్లును బ్రిటిష్ పార్లమెంట్‌లో ప్రవేశపెట్టారు. గిల్గిత్ బాల్టిస్థాన్ ప్రాంతం న్యాయంగా, రాజ్యాంగపరంగా భారత్ ఆధీనంలో జమ్మూ కశ్మీర్ ప్రాంతానికి చెందింది. కానీ అది 1947 నుంచి పాకిస్థాన్ దురాక్రమణలో ఉంది. అక్కడి ప్రజల ప్రాథమిక హక్కులను కూడా పాక్ కాలరాస్తోందంటూ బ్రిటన్ పార్లమెంట్ తీర్మానంలో వెల్లడించారు. గిల్గిత్ బాల్టిస్థాన్ పట్ల పాకిస్థాన్ వైఖరిని బ్రిటన్ పార్లమెంటేరియన్లు ఖండించారు. వివాదాస్పద ప్రాంతం గుండా చైనా పాక్ ఎకనమిక్ కారిడార్ ఏర్పాటు అక్రమమని వారు అభివర్ణించారు.

పాకిస్థాన్‌లో ఇప్పటి దాకా పంజాబ్, సింధు, బలూచిస్థాన్, ఖైబర్ పఖ్తుంక్వా ప్రావిన్సులు ఉండగా.. ఐదో ప్రావిన్సుగా గిల్గిత్ బాల్టిస్థాన్‌ను ఏర్పాటు చేయాలని ప్రధాని విదేశాంగ సలహాదారు సర్తాజ్ అజిజ్ నేతృత్వంలో ఏర్పాటైన కమిటీ సూచించింది.