బ్రిటన్ ప్రధాని ‘థెరిసా మే’కు షాక్‌!

ముందస్తు ఎన్నికలతో ముందుకెళ్లిన బ్రిటన్ ప్రధాని థెరిసా మేకు పెద్ద షాక్ తగిలింది. ప్రభుత్వ ఏర్పాటుకు అవసరమైన మెజారిటీ స్థానాలను గెలుపొందడంలో థెరిసా మే నేతృత్వంలోని అధికార కన్జర్వేటివ్‌ పార్టీ విఫలమైంది. ప్రతిపక్ష లేబర్‌ పార్టీ అనూహ్యంగా పుంజుకొంది. మొత్తం 650 స్థానాలకుగాను ఇప్పటి వరకూ 643 స్థానాల్లో ఫలితాలు వెల్లడయ్యాయి. కన్జర్వేటివ్‌ పార్టీ 313 స్థానాల్లో విజయబావుటా ఎగరేయగా.. లేబర్‌ పార్టీ 260 స్థానాలను దక్కించుకుంది. ప్రభుత్వాన్ని ఏర్పాటు చేయాలంటే కనీసం 326 స్థానాల్లో గెలుపొందాల్సి ఉండగా.. ఏ పార్టీకి సాధారణ మెజారిటీ రాలేదు. దీంతో హంగ్‌ ప్రభుత్వం ఏర్పడనుంది. ప్రజల మద్దతు కోల్పోయిన థెరిసా మే తన పదవికి రాజీనామా చేయాలనే డిమాండ్‌కు ప్రజల నుంచి మద్దతు పెరుగుతోంది. థెరిసా మే తక్షణమే తన పదవికి రాజీనామా చేయాలంటూ లేబర్‌ పార్టీ నేత జెరెమె కార్బిన్‌ డిమాండ్‌ చేశారు.

2016లో బ్రెగ్జిట్‌ అనంతరం డేవిడ్‌ కామెరాన్‌ ప్రధాని పదవి నుంచి తప్పుకోగా.. థెరిసా మే బాధ్యతలు చేపట్టిన విషయం తెలిసిందే. షెడ్యూల్‌ ప్రకారం తర్వాతి ఎన్నికలు 2020లో జరగాల్సి ఉండగా.. పార్లమెంట్‌లో తన బలం పెంచుకొవాలనే లక్ష్యంతో థెరిసా మే మూడేళ్ల ముందుగానే ఎన్నికలకు వెళ్లారు. తాజాగా వెల్లడైన ఫలితాల్లో ఆమె నేతృత్వంలోని అధికార కన్జర్వేటివ్‌ పార్టీకి గట్టి ఎదురుదెబ్బ తగిలింది.