అవును.. నేనే నా సోదరిని చంపాను

సోషల్ మీడియాలో అసభ్యకరమైన ఫోటోలను పోస్ట్ చేస్తున్నదనే ఆగ్రహంతోనే తాను తన చెల్లెలిని హతమార్చినట్లు పాక్ మోడల్ ఖండీల్ బలోచ్ అన్న మహమ్మద్ వసీం అంగీకరించాడు. ఆమె వల్ల కుటుంబ పరువు ప్రతిష్టలు మంటగలిసిపోతున్నాయని చెప్పి చాలాసార్లు హెచ్చరించినా మార్పు లేదన్నాడు. శుక్రవారం రాత్రి ముల్తాన్‌లో వసీం చేతిలో ఆమె దారుణంగా హత్యకు గురైన సంగతి తెలిసిందే. ఇది పరువు హత్యేనని తొలినుండి పోలీసులు భావిస్తూ వచ్చారు. వసీం ప్రకటనతో అది నిజమైంది. తనను హతమారుస్తామని అనేక బెదిరింపు కాల్స్ వస్తున్నాయని, తన ప్రాణాలకు ముప్పు ఉందని ఆమె పాక్ ఉన్నతాధికారులకు ఎన్నోమార్లు లేఖలు కూడా రాసింది. ఖండీల్ బలోచ్ అసలు పేరు ఫౌజియా అజీమ్. కానీ మోడలింగ్‌లోకి వచ్చిన తర్వాత ఆమె పేరు మార్చుకుంది. సోషల్ మీడియాలో తన ఫొటోలు, వీడియోలతో ఆమె వివాదాస్పద వ్యక్తిగా మారింది.