మాడ్రిడ్‌లో పేలుడు.. ముగ్గురి మృతి

స్పెయిన్ రాజధాని మాడ్రిడ్‌లో పేలుడు సంభవించింది. ఈ ఘటనలో ముగ్గురు వ్యక్తులు దుర్మరణం పాలయ్యారు. పదుల సంఖ్యలో గాయపడ్డారు. గ్యాస్ లీక్ కారణంగానే ఆ పేలుడు సంభవించినట్లు అధికారులు తెలిపారు. బాంబు పేలుడు సంభవించిందేమోనని స్థానికులు భయభ్రాంతులకు గురయ్యారు.

పేలుడు తీవ్రతకు బహుళ అంతస్తుల భవనం కొంత భాగం కుప్పకూలింది. ఐదు అంతస్తుల్లో మంటలు చెలరేగాయి. శిథిలాల కింద చిక్కుకొని పలువురు ఆర్తనాదాలు చేశారు. ప్రమాద విషయం తెలియగానే అధికారులు, రెస్క్యూ సిబ్బంది ఘటనా స్థలికి చేరుకొని సహాయ కార్యక్రమాలు చేపట్టారు.

గాయపడిన వారిని ఆస్పత్రికి తరలించి చికిత్స అందిస్తున్నట్లు అధికారులు తెలిపారు. వారిలో పలువురి పరిస్థితి విషమంగా ఉన్నట్లు తెలుస్తోంది. పేలుడు కారణంగా ఆ ప్రాంతమంతా దట్టమైన పొగ అలుముకుంది. సహాయ కార్యక్రమాలకు కొనసాగుతున్నాయి.