బ్రేక్‌కు బదులు ఎక్స్‌లేటర్‌ తొక్కింది.. తర్వాత..

ఒక్కోసారి చిన్నపొరపాటు కూడా ప్రాణం మీదకి తెస్తుందంటే ఇదేనేమో.. కాలిఫోర్నియాలో మంగళవారం (జూన్ 12) జరిగిన ఈ ఘటనలో ఓ వృద్ధురాలు తృటిలో పెనుప్రమాదం నుంచి బయటపడింది. ఫ్రాన్స్‌కు చెందిన ఓ వృద్ధురాలు అమెరికా పర్యటనకు వచ్చింది. పర్యటనలో భాగంగా కాలిఫోర్నియా పరిధిలోని శాంటా మోనికాలోని ఓ భవనంలో కార్‌ పార్క్‌ చేసి రావడానికి నాలుగో అంతస్తులోని మల్టీ లెవల్‌ పార్కింగ్‌ వద్దకు వెళ్లింది. పార్కింగ్‌ సమయంలో పొరపాటుగా బ్రేక్‌ బదులు యాక్సిలరేటర్‌ తొక్కింది. అంతే ఒక్కసారిగా వేగంగా ముందుకెళ్లిన కారు ముందున్న తీగలను బలంగా ఢీకొట్టింది.

తీగలు కారును కింద పడకుండా ఆపడంతో ఆమె ప్రాణాపాయం నుంచి బయటపడింది. దీంతో నాలుగో అంతస్థు నుంచి కారు వేలాడుతూ కనిపించింది. వెంటనే అప్రమత్తమైన అగ్నిమాపక సిబ్బంది కారులో ఉన్న ఆమెను రక్షించారు. ఈ ఘటనలో ఆమెకు ఎలాంటి గాయాలు కాలేదు. అనంతరం క్రేన్‌ సహాయంతో కారును కూడా బయటకు తీశారు. ఈ విషయాన్ని అగ్నిమాపక సిబ్బంది ట్విట్టర్ ద్వారా తెలిపారు. ఇకపై ఇలాంటి ఘటనలు జరగకుండా జాగ్రత్త పడాలని సూచించారు.