Coronavirus 41కి చేరిన కరోనా మృతులు.. చైనాలో ఆరు రోజుల్లో 1000 పడకల హాస్పిటల్ నిర్మాణం!

కరోనా వైరస్ కారణంగా మరణించినవారి సంఖ్య 41కి చేరినట్టు చైనా శనివారం ప్రకటించింది. అలాగే మరో 1,287 మందికి ఈ వైరస్ సోకినట్టు తెలిపింది. ఈ నేపథ్యంలో పలు నగరాల్లో ప్రజా రవాణాను నిలిపివేసిన అధికారులు.. కరోనా వైరస్ సోకిన రోగులకు చికిత్స కోసం 1000 పడకల ఆస్పత్రిని ఆరు రోజుల్లో నిర్మించనున్నట్టు తెలిపారు. జనవరి 25 నిర్మాణ పనులు ప్రారంభించి ఫిబ్రవరి 3 నాటికి రోగులకు అందుబాటులోకి తీసుకురానున్నారు. చైనాలోని 29 ప్రావిన్సుల్లో కరోనా వైరస్ విస్తరించినట్టు ఆరోగ్య శాఖ వెల్లడించింది. కరోనా వైరస్ మూలంగా 41 మంది ప్రాణాలు కోల్పోగా, దీని బారినపడ్డ మరో 237 మంది పరిస్థితి విషమంగా ఉన్నట్టు వివరించారు. ఒక్క హుబే ప్రావిన్సుల్లోనే 39 మంది చనిపోయారు.

Read Also: కరోనా వైరస్ ఎఫెక్ట్: రిపబ్లిక్ డే వేడుకలు రద్దు
ఇదిలా ఉండగా, ఆస్ట్రేలియాలోనూ కరోనా వైరస్ తొలి కేసు శనివారం గుర్తించారు. గతవారం చైనా నుంచి వచ్చిన 50 ఏళ్ల వ్యక్తిలో వైరస్ లక్షణాలు బయటపడ్డాయి. అటు ఐరోపాలోనూ కరోనా ప్రవేశించింది. ఫ్రాన్స్‌లో ముగ్గురికి కరోనా వైరస్ లక్షణాలు ఉన్నట్టు శనివారం గుర్తించామని తెలిపారు. అమెరికాలోనూ రెండో కేసు నమోదయ్యింది. చైనా నుంచి వచ్చిన చికాగో మహిళ ఈ వ్యాధి లక్షణాలతో హాస్పిటల్‌లో చేరింది. ఆమెను ప్రత్యేక విభాగంలో ఉంచి చికిత్స అందజేస్తున్నారు. కరోనా వైరస్ కారణంగా చైనాలో అంత్యంత ప్రతిష్ఠాత్మకమైన కొత్త ఏడాది ఉత్సవాలను ప్రభుత్వం రద్దుచేసింది.

Read Also: కరోనా వైరస్: పరిశీలనలో 12 మంది భారతీయులు.. వారిలో ఓ హైదరాబాదీ!

కరోనా వైరస్ స్టాక్ మార్కెట్లను కూడా కుదిపేస్తోంది. ఆర్ధిక, ఆరోగ్య సంరక్షణ, విమానయాన, టూరిజం, ట్రావెల్ రంగాలకు తీవ్రమైన నష్టం కలుగుతోంది. చైనాలోని మొత్తం 12 నగరాలకు రాకపోకలు నిలిచిపోయాయి. ఆ నగరాల్లోని 3.6 కోట్ల మంది ప్రజలకు బయట ప్రదేశాలతో సంబంధాలు తెగిపోయాయి. వుహాన్‌ నగరంలోని హాస్పిటల్స్‌కు రోగులు పోటెత్తడంతో సరైన సౌకర్యాలు లేక ఇబ్బందులు పడుతున్నారు.

Read Also: ముంబైలో ఇద్దరికి కరోనా వైరస్ లక్షణాలు

ఔషధాలు, క్రిమిసంహారక పరికరాలు, మాస్కులు, గాగుల్స్, గౌన్లు ఇతర రక్షణ సామగ్రిని అందజేయాలని వుహాన్, ఇతర నగరాల్లోని అధికారులు పిలుపునిచ్చారు. వుహాన్‌లో 1000 పడకల హాస్పిటల్‌ను ఆరు రోజుల్లో నిర్మించనున్నామని, 2002లో సార్స్ వైరస్ సోకినప్పుడు బీజింగ్‌లో ఇదే తరహాలో హాస్పిటల్ శరవేగంగా నిర్మించామని తెలిపారు. కరోనా వైరస్ కూడా సార్స్ కుటుంబానికి చెందినదేనని శాస్త్రవేత్తలు పేర్కొంటున్నారు. ఇది ఫ్లూ కంటే అత్యంత ప్రమాదకరమైన వైరస్ అని వివరించారు.