ట్రంప్ ఫోన్ కాల్స్‌ను వింటున్న చైనా, రష్యా!

అమెరికా అధ్యక్షుడు మాట్లాడే ఫోన్ కాల్స్‌ను చైనా గూఢచారులు వింటున్నారా? అధికారిక పనులకు వినియోగించే ఫోన్ కాకుండా వేరే సెల్‌ఫోన్ ద్వారా పాత స్నేహితులతో ఆయన సరదాగా మాట్లాడిన మాటలు, గాసిప్‌లను చైనా చాటుగా వింటోందని న్యూయార్క్ టైమ్స్ రిపోర్ట్ చేసింది. తద్వారా అమెరికా విధానపరమైన నిర్ణయాలను ముందే తెలుసుకునే ప్రయత్నం చేస్తోందని పేర్కొంది.

‘సెల్‌ఫోన్ ద్వారా మీరు మాట్లాడే మాటలను రష్యా గూఢచారులు వినే ప్రమాదం ఉంది. కాబట్టి వ్యక్తిగత ఫోన్ ద్వారా ఎవరితోనూ మాట్లాడొద్ద’ని సహాయకులు ట్రంప్‌ను హెచ్చరిస్తున్నారు. కానీ ఆయన మాత్రం తన ఫోన్‌ను పక్కనబెట్టడానికి ఇష్టపడటం లేదు.

ట్రంప్ కాల్స్‌ను చైనా, రష్యా వింటున్నట్టు విదేశీ ప్రభుత్వాల్లోని వ్యక్తులు, విదేశాంగ అధికారుల ద్వారా అమెరికా నిఘా సంస్థలకు సమాచారం అందింది. ఈ విషయమై వైట్‌హౌస్ నుంచి వెంటనే ఎలాంటి స్పందన వెలువడలేదు.

అమెరికా, చైనా మధ్య వాణిజ్య యుద్ధం మరింత ముదరకుండా ఉండటానికి ఈ ఫోన్ కాల్స్‌ ఉపయోగపడతాయని డ్రాగన్ భావిస్తోంది. ఇందుకోసం ట్రంప్ సన్నిహితులు ఆయనతో ఈ విషయాలను పంచుకునేలా.. అధ్యక్షుణ్ని ప్రభావితం చేసే అంశాలను అతడి సన్నిహితులు ప్రస్తావించేలా.. వారికి తెలిసిన చైనా వ్యాపారులు, బీజింగ్‌తో సంబంధం ఉన్న ఇతర నేతలకు సూచనలు చేస్తోంది.