పాకిస్థాన్‌కు చైనా సైనిక సహకారం: గ్లోబల్ టైమ్స్

రక్షణ రంగంలో పాకిస్థాన్‌కు చైనా పూర్తి సహకారం అందించనుందని కమ్యూనిస్ట్ అధికార పత్రిక గ్లోబల్ టైమ్స్ గురువారం ఓ కథనాన్ని ప్రచురించింది. కేవలం ఆయుధాల మార్పిడి, పెరుగుదలే కాకుండా, బాలిస్టిక్, యాంటీ ఎయిర్‌క్రాఫ్ట్, యాంటీ- నౌక క్షిపణులు, యుద్ధ ట్యాంకుల నిర్మాణంలోనూ పరస్పరం సహకరించుకుంటాయని తెలిపింది. తేలికపాటి, బహుళ వ్యవస్థ యుద్ధ విమానం ఎఫ్-సి క్సీలోలోంగ్‌ను ఇరు దేశాలు సంయుక్తంగా అభివృద్ధి చేస్తాయని ఆ పత్రిక తెలిపింది.

చైనాలోని తూర్పు తుర్కెస్థాన్ ప్రాంతంలోని ఇస్లామిక్ తిరుగుబాటుతోపాటు ఇరు దేశాల్లోని ఉగ్రవాద కార్యకలాపాల కట్టడి, తీవ్రవాద సంస్థలపై దాడులకు పరస్పరం ఒప్పందం చేసుకున్నాయని తెలిపింది. ఈ అంశంపై పాకిస్థాన్ ఆర్మీ చీఫ్ ఖ్యామర్ బజ్వా, చైనా మిలటరీ అధికారి ఫాంగ్ ఫెంగ్యూ‌తో బీజింగ్‌లో బుధవారం అధికారికంగా సమావేశమైనట్లు గ్లోబల్ టైమ్స్ తెలిపింది.

చైనా- పాకిస్థాన్ ఎకనమిక్ కారిడార్ రక్షణ కోసం చైనా అందించే కానుకలకు పాకిస్థాన్ అంగీకారం తెలిపిందిని కథనంలో వివరించింది. సాధారణ లక్ష్యం కోసం ఇరు దేశాలు ఒకదానితో ఒకటి స్నేహపూర్వకమైన ప్రత్యేక సంబంధాలను ఆనందిస్తున్నాయని పాకిస్థాన్ ఆర్మీ చీఫ్ ఖ్యామర్ బజ్వా ఈ సమావేశంలో వ్యాఖ్యానించినట్లు చైనా రక్షణ మంత్రిత్వ శాఖ వెబ్‌సైట్‌లో పేర్కొన్నారు.

చైనా- పాక్ ఎకనమిక్ కారిడార్ కోసం పాకిస్థాన్ 15 వేల మంది సైనికుల నియమించిందని, అలాగే నేవీ కూడా గ్వాదర్ పోర్టులో భద్రతను మరింత పటిష్ఠం చేసిందని చైనాలోని పాకిస్థాన్ రాయబారి మసూద్ ఖలీద్ అన్నట్లు గ్లోబల్ టైమ్స్ పత్రిక తెలియజేసింది. సీపీఈసీలో గ్వాదర్ పోర్ట్ అత్యంత కీలకమైంది. తాలిబన్, అల్-ఖైదా లాంటి తీవ్రవాద సంస్థల నుంచి పాక్ నిరంతరం దాడులను ఎదుర్కొంటున్న ప్రస్తుత తరుణంలో సురక్షిత వాతావరణం కోసం సైనిక మద్దతు ఎంతో అవసరమని, దాని కోసం చైనా పెద్ద మొత్తంలో పెట్టుబడి పెట్టనుందని ఆ దేశ ఆర్మీకి చెందిన నిపుణుడు సాంగ్ జాంగ్‌పింగ్ అన్నట్లు ఆ పత్రిక తెలిపింది.

చైనా సైన్యంతో పనిచేయడానికి తమ ఆర్మీ సిద్ధంగా ఉందని, అఫ్ఘానిస్థాన్, చైనా, పాకిస్థాన్, తజికిస్థాన్ దళాల సహకారంతో తీవ్రవాదాన్ని ఎదుర్కొంటామని పాక్ ఆర్మీ చీఫ్ అన్నారు.