యాప్నగరం

శ్మశానాల్లో చోటు లేక వీధుల్లోనే దహనం.. చైనాలో భయానక పరిస్థితి

Covid Updates: చైనాను కోవిడ్ వైరస్ కకావికలం చేస్తోంది. ప్రధాన నగరాల్లో 70 శాతానికి పైగా మంది వైరస్ బారినపడ్డారు. ఆస్పత్రుల్లో ఖాళీలు లేవు. రోగులకు వైద్యం అందట్లేదు. మార్చురీలు, శ్మశానవాటికలు నిండిపోయాయి. దహన సంస్కారాల ఖర్చులను విపరీతంగా పెంచేశారు. శ్మశానాల ముందు కిలోమీటర్ల మేర మృతదేహాలతో ఉన్న వాహనాలు బారులు తీరిన దృశ్యాలు కనిపిస్తున్నాయి. చాలా మంది తమ వారి అంత్యక్రియలను వీధుల్లో, రోడ్లపై నిర్వహిస్తున్నారు. వచ్చే నెల 21 లక్షల కోవిడ్ మరణాలు సంభవించవచ్చని అంచనా.

Authored byశ్రీనివాస్ గంగం | Samayam Telugu 4 Jan 2023, 10:07 pm
చైనాలో కరోనా వైరస్ కల్లోలం సృష్టిస్తోంది. ఎటు చూసినా విషాద దృశ్యాలే కనిపిస్తున్నాయి. శ్మశానాల్లో చోటు దొరక్క వీధుల్లో, రోడ్లపైనే తమ వారిని దహనం చేస్తున్నారు. ఆస్పత్రులన్నీ పేషంట్లతో నిండిపోయాయి. శ్మశానాల ముందు కిలోమీటర్ల మేర వాహనాలు బారులు తీరిన దృశ్యాలు సోషల్ మీడియాలో వైరల్‌గా మారాయి. ఆస్పత్రులు, క్లినిక్‌ల ముందు పేషంట్లు చికిత్స కోసం కిలోమీటర్ల మేర బారులు తీరి ఉన్న దృశ్యాలు కనిపిస్తున్నాయి. షాంఘైలోని జనాభాలో ఇప్పటికే 70 శాతానికి పైగా మంది కోవిడ్ బారిన పడ్డారని అంతర్జాతీయ మీడియా కథనాల్లో పేర్కొన్నారు. అంతర్జాతీయ ఆరోగ్య నిపుణులు రాబోయే నెలల్లో 21 లక్షల కోవిడ్ మరణాలు సంభవించవచ్చునని చెబుతున్నారు.
Samayam Telugu chinese families forced to burn bodies of loved ones in streets as crematoriums overflow
శ్మశానాల్లో చోటు లేక వీధుల్లోనే దహనం.. చైనాలో భయానక పరిస్థితి


కేసులు భారీ సంఖ్యలో వస్తుండటంతో ఆస్పత్రులు కిక్కిరిసిపోయాయి. చాలా మందికి వైద్యం అందట్లేదు. మార్చురీలు మృతదేహాలతో నిండిపోయాయి. శ్మశానాల్లో ఖాళీలు లేక రోడ్ల వెంట కూడా శవాలు పోగవుతున్నాయి. శ్మశానవాటికల వద్ద రాత్రి నుంచే క్యూ కడుతున్నారు. ఉదయం శ్మశానవాటికలు తెరవగానే.. తమ వారి పేర్లు నమోదు చేయించేందుకు జనం పరుగులు పెడుతున్న దృశ్యాలు కలిచివేస్తున్నాయి.


ఇదే అదనుగా కొన్ని శ్మశానవాటికలు దహన సంస్కారాల ఖర్చును విపరీతంగా పెంచేశాయి. అలాంటి క్రెమటోరియాలపై ప్రజలు ఆగ్రహంతో దాడి చేస్తున్నట్లు డైలీ మెయిల్ ఓ కథనంలో పేర్కొంది. చేసేదేంలేక ప్రజలు తమ వారి దహన సంస్కారాలను వీధుల్లో నిర్వహించాల్సి వస్తోందని పేర్కొన్నారు.

చైనీస్ సోషల్ మీడియా ప్లాట్‌ఫారం ‘వీబో’లో అక్కడి విషాద ఘటనలకు సంబంధించిన వీడియోలు అనేకం వైరల్ అవుతున్నాయి. ‘నా తండ్రి కోవిడ్‌తో మరణించాడు. పెంచిన దహన సంస్కారాల ఖర్చు భరించలేకుండా ఉంది. అందువల్ల రోడ్డు పక్కనే దహన క్రియలు జరపాల్సి వస్తోంది’ అంటూ ఓ వ్యక్తి వీడియో పోస్టు చేసినట్లు బ్లూమ్‌బర్గ్ మీడియా కథనంలో పేర్కొన్నారు.



చైనాలో కోవిడ్ వైరస్ వ్యాప్తి చాలా విస్తృతంగా ఉందని.. ప్రధాన నగరాల్లో 70 శాతం మంది ఈ వైరస్ బారిన పడ్డారని అక్కడి వైద్యులు చెబుతున్నట్లు అంతర్జాతీయ మీడియా వెల్లడించింది. గత ఏప్రిల్, మే నెలలతో పోలిస్తే.. ఇది 20 నుంచి 30 రెట్లు అధికమని పేర్కొన్నారు.

చైనా ప్రభుత్వం గత నెలలో కఠినమైన జీరో-కోవిడ్ ఆంక్షలను సడలించింది. నాటి నుంచి అక్కడ కోవిడ్ కేసుల్లో భారీ పెరుగుదల నమోదైంది. లండన్‌కు చెందిన ఎనలిటిక్స్ సంస్థ ఎయిర్‌ఫినిటీ నివేదిక ప్రకారం.. డిసెంబర్ మొదటి 20 రోజుల్లో చైనాలో 250 మిలియన్లకు పైగా ప్రజలు ఈ వైరస్ బారిన పడ్డారు. అక్కడ పరిస్థితి భయానకంగా మారిన నేపథ్యంలో భారత్ సహా పలు దేశాలు అప్రమత్తమయ్యాయి.
రచయిత గురించి
శ్రీనివాస్ గంగం
శ్రీనివాస్ రెడ్డి గంగం సమయం తెలుగులో సీనియర్ డిజిటల్ కంటెంట్ ప్రొడ్యూసర్‌గా పని చేస్తున్నారు. ఏపీ, తెలంగాణ, జాతీయ, అంతర్జాతీయ అంశాలపై వార్తలు, ప్రత్యేక కథనాలు అందిస్తుంటారు. EJS నుంచి శిక్షణ పొందిన శ్రీనివాస్‌కు జర్నలిజంలో 12 ఏళ్లకు పైగా అనుభవం ఉంది. JNTU నుంచి BTech చేశారు. గతంలో ప్రముఖ పత్రికల్లో వార్తలు, విద్యా సంబంధిత అంశాలు అందించారు.... మరిన్ని చదవండి

తరవాత కథనం

Telugu News App: ఏపీ, తెలంగాణకు సంబంధించిన లేటెస్ట్ అప్‌డేట్స్‌, జాతీయ, అంతర్జాతీయ, ఎడ్యుకేషన్, బిజినెస్, సినిమా, ఆధ్యాత్మికం, స్పోర్ట్స్, వైరల్ కథనాల కోసం తెలుగు సమయం యాప్‌ను డౌన్‌లోడ్ చేసుకోండి.
తాజా వార్తల అప్డేట్ల కోసం Samayam Telugu ఫేస్‌బుక్పేజీను లైక్ చెయ్యండి.