వైరల్ : ఆమెకు భూమి మీద నూకలున్నాయి

వెనుక నుంచి మృత్యుశకటంలా వచ్చిన ఓ భారీ వాహనం మహిళ స్కూటీ మీదుగా దూసుకెళ్లింది. ప్రమాదం ఘటన చూసిన వారంతా మహిళ ప్రాణాలు గాల్లో కలిసి పోయాయని భావించారు. కానీ ఆమెకు ఏ గాయం కాలేదు. ఈ ఘటన చైనాలో చోటుచేసుకుంది. ఇందుకు సంబంధించిన వీడియోను చైనా పీపుల్స్ డైలీ ట్విటర్‌లో పోస్ట్ చేసింది. అయితే వీడియో చూసిన నెటిజన్లు ఆ మహిళకు భూమిపై ఇంకా నూకలున్నాయని కామెంట్ చేస్తున్నారు.

చైనాలోని గాంగ్‌డాంగ్ ప్రావిన్స్ లోని మావోమింగ్‌లో ఓ మహిళ తన స్కూటీపై వెళ్తోంది. ఓ మలుపు వద్ద ఆమె వెనుకనుంచి వేగంగా వచ్చిన భారీ ట్రక్కు.. మహిళ స్కూటీని ఢీకొట్టి మీదుగా దూసుకెళ్లింది. ఈ ప్రమాదంలో మహిళ పరిస్థితి ఏమిటా అని చుట్టుపక్కల వారు అనుకుంటుండగా.. క్షణాల్లో మహిళ ఎవరి సాయం లేకుండా లేచి నిల్చుంది. దీంతో అవాక్కవడం వారి వంతైంది. ఆమెను మించిన అదృష్టవంతురాలు మరొకరు ఉండరని చైనా మీడియా ట్విటర్ పోస్టుపై స్పందిస్తున్నారు.