Gay Marriage: గే మ్యారేజ్‌స్‌కు గ్రీన్ సిగ్నల్.. స్వలింగ సంపర్కుల పెళ్లికి ఓకే చెప్పిన క్యూబా

క్యూబాలో ఇక నుంచి స్వలింగ సంపర్కులు (Gay Marriage) పెళ్లి చేసుకోవచ్చు. ఒకే జెండర్‌కు సంబంధించిన వ్యక్తులు ఇక నుంచి పెళ్లి చేసుకోవడానికి ఆ దేశ ప్రభుత్వం ఆమోదం తెలిపింది. దీనికి వీలుగా ఒక కొత్త చట్టాన్ని రూపొందించారు. అంతేకాదు వాళ్లు పిల్లల్ని దత్తత తీసుకునే అవకాశాన్ని కూడా కల్పించారు.

ప్రభుత్వం ఈ చట్టంపై మొదట దేశంలో ప్రజల నుంచి అభిప్రాయం సేకరించింది. చట్టానికి అనుకూలంగా 66.9 శాతం మంది ఓటు వేశారు. అంటే దాదాపుగా 40 లక్షలమంది ఓకే చెప్పారు. 33 శాతం మంది మాత్రం ప్రతికూలంగా స్పందించారు. మెజార్టీ అభిప్రాయాన్ని పరిగణలోకి తీసుకుని.. జాతీయ ఎన్నికల మండలి ఈ చట్టానికి ఆమోద ముద్ర వేసింది. ప్రజల నుంచి భారీ మద్దతు వచ్చినందుకు ఈ చట్టానికి గ్రీన్ సిగ్నల్ ఇచ్చినట్టు ఎన్నికల సంఘం వెల్లడించింది.


అయితే ఈ రెఫరెండమ్‌ను కొన్ని క్రైస్తవ సంఘాలు తీవ్రంగా వ్యతిరేకించాయి. కానీ స్వలింగ సంపర్కులకు అనుకూలంగానే తీర్పు వచ్చింది. దీనిపై ఆ దేశ ప్రెసిడెంట్ మిగుల్ డియాజ్ కెనాల్ స్పందించారు. ఎట్టకేలకు న్యాయం జరిగిందని, ప్రేమే ఇప్పుడు ఈ దేశంలో కొత్త చట్టమని ఆయన ట్వీట్ చేశారు. ఈ చట్టం కోసం కొన్ని కుటుంబాలు చాలా ఏళ్లుగా చూస్తున్నాయని, కొందరు రుణం తీర్చుకున్నట్టైందని ఆయన పేర్కొన్నారు. క్యూబాలో ఇప్పటికే మహిళా హక్కులకు ఎక్కువ ప్రాధాన్యం ఉంటుంది. ఈ కొత్త చట్టం సరోగేట్ పద్ధతిలో పిల్లలను కనే అవకాశాన్ని కల్పిస్తుంది. పెళ్లి చేసుకునే జంట.. ఇంటి పని, బయట పని సమానంగా చేయాలనే నిబంధనలు ఇందులో ఉన్నాయి.

కాగా లాటిన్ అమెరికా దేశాలు స్వలింగ సంపర్కుల హక్కులను కాపాడేందుకు ఇలాంటి చర్యలు తీసుకున్నాయి. 2020లో కోస్టారికా స్వలింగ వివాహాలను చట్టబద్ధం చేసింది. 2019లో ఈక్వెడార్ న్యాయస్థానం స్వలింగ జంటలు వివాహం చేసుకోవచ్చని తీర్పునిచ్చింది. ప్రపంచవ్యాప్తంగా గే కల్చర్ పెరుగుతుంది. మన దేశంలో కూడా స్వలింగ సంపర్కుల వివాహాలు జరుగుతున్నాయి. పెద్దల అంగీకారంతో.. సంప్రదాయ బద్ధంగా పెళ్లి చేసుకుంటున్నారు.

Read More International News And Telugu News