ఆమె తొలి అధ్యక్షురాలైతే అమెరికాకు అవమానం.. కమలాపై ట్రంప్ ఘాటు వ్యాఖ్యలు

డెమోక్రాటిక్ ఉపాధ్యక్ష అభ్యర్థి, భారతీయ అమెరికన్ కమలా హ్యారిస్‌పై అమెరికా అధ్యక్షుడు డొనాల్డ్ ట్రంప్ విమర్శల పర్వం కొనసాగుతోంది. అమెరికా అధ్యక్ష పదవి చేపట్టే అర్హత ఆమెకు లేదని ఇటీవల రిపబ్లికన్ జాతీయ కన్వెన్షన్‌లో ట్రంప్ వ్యాఖ్యానించిన విషయం తెలిసిందే. తాజాగా, మళ్లీ అలాంటి వ్యాఖ్యలే చేశారు. కమలా హ్యారిస్‌ను ప్రజలు ఇష్టపడరని, ఒకవేళ ఆమె అధ్యక్షురాలైతే అమెరికాకు అంతకంటే అవమానం మరొకటి ఉండదని తీవ్రస్థాయిలో విమర్శించారు.

‘ఓ విషయం గుర్తించుకోవాలి.. ఒకవేళ బిడెన్ విజయం సాధిస్తే చైనా గెలిచినంత సులభం. ప్రపంచ చరిత్రలో గొప్ప ఆర్థిక వ్యవస్థను నిర్మించే పరిస్థితి మనకు ఉంది.. చైనా వైరస్ వచ్చింది కాబట్టి మేము మూసివేయవలసి వచ్చింది.. ఇప్పుడు మేము మళ్లీ ఆర్ధిక వ్యవస్థను తెరిచాం’ అని నార్త్ కరోలినా ఎన్నికల ర్యాలీలో వ్యాఖ్యానించారు.

జనం ఎవరు కూడా డెమోక్రాటిక్ ఉపాధ్యక్ష అభ్యర్థి కమలా హ్యారిస్‌ను ఇష్టపడటం లేదు.. అమెరికాకు ఆమె తొలి మహిళా అధ్యక్షరాలు కాలేదు.. ఇది మనదేశానికి అవమానంగా ఉంటుంది’ అని ట్రంప్ సంచలన వ్యాఖ్యలు చేశారు. చైనా, ఆందోళనకారులు బిడెన్ విజయం సాధించాలని కోరుకుంటున్నారు, ఎందుకంటే అతడి విధానాల వల్ల అమెరికా పతనంం ఖాయమని స్పష్టమవుతోందన్నారు.

పోటీ నుంచి తప్పుకున్న ఆమెను వచ్చే ఎన్నికల్లో తన సహచర అభ్యర్థినిగా బిడెన్ ఎన్నుకోవడం ఆసక్తికరమని ట్రంప్ అన్నారు. ‘ఆమె పోటీ నుంచి (అధ్యక్ష అభ్యర్థిగా) తప్పుకుంది. అటువంటి ఆమెను ఎన్నుకోవడం ఆసక్తికరంగా ఉంది.. ఎందుకంటే సిద్ధాంతపరంగా కాలిఫోర్నియాను వారు గెలవాలి.. కానీ, మేము వారి కోసం పోరాడాలని తెలియదు.. ఎన్నికలలో పాల్గొనే వారినే ఎన్నుకుంటారు’ అని వివరించారు.

‘తాను అధికారంలోకి రాకముందు చైనాతో వాణిజ్య ఒప్పందం చాలా భిన్నంగా ఉండేది.. ఓ గొప్ప ఒప్పందంపై సంతకాలు చేశాం.. కానీ, పత్రాలపై సిరా ఆరకముందే కోవిడ్ వ్యాప్తిచెందింది’ అన్నారు.