అసలైన స్నేహితుడికి అరుదైన గుర్తింపు.!

ఢాకాపై దాడి ఘటన సమయంలో భారతీయ స్నేహితురాలి కోసం తన ప్రాణాన్నే పణంగా పెట్టిన ఫరాజ్ హుస్సేన్ గుర్తున్నాడా? అమరుడైన ఆ బంగ్లాదేశ్ ముస్లిం విద్యార్థికి ట్యూనీషియా అరుదైన రీతిలో గౌరవించింది. ఆ దేశ రాజధాని నగరం ట్యూనిష్‌లో ఉన్న ‘గార్డెన్ ఆఫ్ ది రైటియస్ వరల్డ్ వైడ్ (గారివో)’లో అతడి కోసం ఓ స్మారక చిహ్నాన్ని ఏర్పాటు చేసింది. నిష్కళంకమైన ముస్లింల కోసం ఇందులో చెట్లు, స్మారక స్థూపాలు ఏర్పాటు చేస్తారు. ఇటాలియన్ ఎంబసీలో ఉండే ఈ గారివోలో చోటు దక్కిన తొలి అరబ్ యేతర ముస్లిం ఫరాజ్ కావడం విశేషం. టెర్రరిజంపై అతడి పోరాటానికి గానూ ఈ గౌరవం లభించింది. ఇటలీ విదేశాంగ మంత్రిత్వ శాఖ సహాయంతో గారివోను ఏర్పాటు చేశారు. ఫరాజ్‌తోపాటు సిరియాకు చెందిన ఆర్కియాలజిస్ట్ ఖలేద్ అల్ అసద్, మరో ముగ్గురు ట్యూనీషియన్లకు ఈ గార్డెన్‌లో చోటు దక్కింది. ఫరాజ్ త్యాగం విషయమై ఇటాలియన్ ఎంబసీకి అతడి తల్లి లేఖ రాయడంతో ఈ నిర్ణయం తీసుకున్నారు. ఈ రకంగా ఫరాజ్ ప్రాణ త్యాగానికి స్వదేశంలోనే కాకుండా ప్రపంచవ్యాప్తంగా గుర్తింపు లభించినట్లైంది.
అట్లాంటాలోని ఎమోరీ యూనివర్సిటీ విద్యార్థి అయిన ఫరాజ్ భారతీయ స్నేహితురాలైన తరిషి జైన్, అబింతా కబీర్‌తో కలిసి ఢాకా కేఫ్‌కు వెళ్లాడు. ఆ సమయంలో ఉగ్రవాదులు కాల్పులు జరిపారు. 20 ఏళ్ల ఫరాజ్‌కు అక్కడి నుంచి తప్పించుకునే అవకాశం ఉన్నప్పటికీ తన స్నేహితుల కోసం ఉగ్రవాదుల చేతిలో హతమయ్యాడు. స్నేహితుల కోసం తన ప్రాణాన్ని సైతం కాదనుకున్న ఈ గొప్ప మిత్రుడికి అరుదైన గుర్తింపు దక్కడం సబబే కదూ!