విమానం పైనుంచి చేపల వర్షం

విమానం నుంచి చేపల వర్షం ఏంటనుకుంటున్నారా? చెరువులో చేపలు ఉంటే మనం ఏం చేస్తాం? పట్టుకొస్తే పులుసు పెట్టుకొని లాగించేస్తాం. చేపల జాతి అంతరించి పోయే దాకా వదిలిపెట్టం. ఇదిలాగే కొనసాగితే అక్కడక్కడా ఆకాశం నుంచి చేపల వర్షం కురిస్తే జనాలు ఏ విధంగా ఐతే ఎగబడతారో.. అలాగే ఆకలేస్తే చేపల కూర తినేందుకు ఆకాశం వైపు ధీనంగా చూసే పరిస్థితి ఏర్పడుతుంది.

అయితే ఉత్తర అమెరికాలోని ఉటాహ్ రాష్ట్రంలోని చెరువుల్లో మాత్రం అందరి అవసరాల కోసం చేపల్ని పెంచుతారు. ఉటాహ్ రాష్ట్రంలోని వన్యప్రాణి సంరక్షణ విభాగానికి చెందిన టెడ్ హాలోస్ అనే వ్యక్తి, కామాస్ సిటీలో ఉన్న చేపల పెంపక కేంద్రంలో భారీ ఎత్తున చేప గుడ్లను పొదిగేసి వివిధ రకాల చేపలను పెంచుతాడు. చేప పిల్లలకు అవసరమైన ఆహారాన్ని సమకూరుస్తాడు. చేపపిల్లలు ఒక వయసు వచ్చిన తర్వాత వాటన్నింటిని మూటగట్టుకొని విమానంలో అక్కడి చెరువులన్నింటిలో జారవిడుస్తున్నాడు. ఆ తర్వాత చేపలు క్రమంగా తమ సంతతిని పెంచుకుంటున్నాయి. ఈ రకంగా హాలోస్ వల్ల ఆ ప్రాంతంలోని చెరువులన్నీ ప్రతీ ఏడాది చేపలతో కళకళలాడుతున్నాయి. తమ చెరువుల్లో ఎప్పుడూ చేపలకు స్టాక్ ఉండటంతో అక్కడి మత్స్యకారులు పండగ చేసుకుంటున్నారు.