దూసుకొస్తున్న ఇర్మా హరికేన్.. ఫ్లోరిడా ఖాళీ

కరీబియన్ దీవులను అతలాకుతలం చేసి, క్యూబాను కకావికలం చేసిన హరికేన్ ఇర్మా ఇప్పుడు అమెరికా మీదికి దూసుకొస్తోంది. ఫ్లోరిడా రాష్ట్ర తీరంవైపు భయంకరంగా దూసుకొస్తున్న ఈ హరికేన్.. అమెరికాలో కనీవినీ ఎరుగని రీతిలో విలయం సృష్టించవచ్చని ఆ దేశ జాతీయ హరికేన్‌ కేంద్రం హెచ్చరించింది. శనివారం బహమాస్, క్యూబా దేశాల్లో భారీ నష్టం మిగిల్చిన ఇర్మా.. ప్రస్తుతం ఫ్లోరిడాలోని కీ వెస్ట్ నగరంవైపు దూసుకొస్తోంది. ప్రస్తుతం కీ వెస్ట్‌కు 95 కి.మీ. దూరంలో ఇర్మా హరికేన్ ఉంది. ఇర్మా దెబ్బకు గంటకు సుమారు 290 కి.మీ వేగంతో పెనుగాలులు వీస్తాయని అంచనా.

వాస్తవానికి ఇర్మా ప్రభావం తగ్గిందని తెలిపిన అమెరికా జాతీయ వాతావరణ కేంద్రం దాన్ని ‘కేటగిరి 3’ హరికేన్‌గా ముందు వెల్లడించారు. అయితే ఎవరూ ఊహించిన విధంగా అత్యంత వేగంతో అతి భయంకరంగా ఇర్మా దూసుకొస్తోంది. కేటగిరీ 3 అంటే హరికేన్‌ సమయంలో గాలుల వేగం గంటకు 178– 208 కిలోమీటర్ల మధ్య ఉంటాయి. కానీ ఇప్పుడు అంతకుమించి ఉండొచ్చని అంచనా. ఇర్మా దెబ్బకు అమెరికా చరిత్రలోనే మొట్టమొదటి సారిగా రికార్డు స్థాయిలో లక్షలాది మందిని సురక్షిత ప్రాంతాలకు తరలించారు. 63 లక్షల మందిని సురక్షిత ప్రాంతాలకు తరలివెళ్లాలని ఫ్లోరిడా రాష్ట్ర అధికారులు విజ్ఞప్తి చేశారు. ప్రజల కోసం మయామి డేడ్ కౌంటీలో పునరావాస కేంద్రాలు ఏర్పాటు చేశారు.
1045p: Outer band from #Irma is pushing across the Keys. Hurricane Force Winds are occurring! Stay inside, away from windows! #FLkeys #flwx pic.twitter.com/n8ExvGP0Za — NWS Key West (@NWSKeyWest) September 10, 2017
ఫ్లోరిడాలో ఉన్న ప్రవాస భారతీయులు సైతం వేలాదిగా పునరావాస కేంద్రాలకు తరలివెళ్లారు. జార్జియా రాష్ట్రంలోని అతిపెద్ద నగరం అట్లాంటాలో హోటళ్లన్నీ ఫ్లోరిడా ప్రజలతో నిండిపోయాయి. ఫ్లోరిడా, జార్జియాతో పాటు, ఉత్తర కరొలినా, దక్షిణ కరొలినా, అలబామా రాష్ట్రాల్లో కూడా అత్యవసర పరిస్థితి ప్రకటించారు. ఇదిలా ఉండగా అమెరికాలోని భారతీయ రాయబార కార్యాలయం శనివారం హెల్ప్‌లైన్ కేంద్రాన్ని ప్రారంభించింది. ఇది 24 గంటలూ పని చేస్తుందని ప్రకటించింది.