Masood Azharకు వ్యతిరేకంగా.. భారత్‌కు బాసటగా రంగంలోకి ఫ్రాన్స్

పుల్వామా ఉగ్రదాడి ఘటన తర్వాత భారత్‌‌కు మద్దతుగా ఫ్రాన్స్ రంగంలోకి దిగుతోంది. ఈ ఉగ్రదాడికి జైషే మహ్మద్ బాధ్యత ప్రకటించినప్పటికీ ఆ సంస్థ చీఫ్ మసూద్ అజహర్‌కు చైనా వత్తాసు పలుకుతున్న సంగతి తెలిసిందే. మసూద్‌ను అంతర్జాతీయ ఉగ్రవాదిగా ప్రకటించకుండా ఐరాసలో చైనా అడ్డు తగులుతోంది. వీటో అధికారంతో డ్రాగన్ భారత్‌ ప్రతిపాదనకు మోకాలడ్డుతోంది. ఈ నేపథ్యంలో మసూద్ అజహర్‌ను అంతర్జాతీయ ఉగ్రవాదిగా గుర్తించే ప్రతిపాదనను ఐరాసలో ఫ్రాన్స్ ముందుకు తీసుకెళ్లనుంది.

ఫ్రాన్స్ గతంలోనూ ఐరాసలో మసూద్ అజహర్‌పై నిషేధం అంశాన్ని ప్రతిపాదించింది. 2017లో బ్రిటన్, ఫ్రాన్స్ మద్దతుతో అమెరికా ఈ ప్రతిపాదనను ఐరాస ఆంక్షల కమిటీ ముందుకు తీసుకొచ్చింది. కానీ మసూద్ అజహర్‌పై అంతర్జాతీయంగా నిషేధం విధించకుండా చైనా అడ్డు తగిలింది.

మసూద్ అజహర్‌ను అంతర్జాతీయ ఉగ్రవాదిగా గుర్తించి, అతడిపై నిషేధం విధించడం కోసం మరి కొద్ది రోజుల్లో ఫ్రాన్స్ ఈ ప్రతిపాదనన ఐరాసలో ప్రవేశపెడుతుందని ఫ్రెంచ్ వర్గాలు తెలిపాయి. ఈ విషయమై జాతీయ భద్రతా సలహాదారు అజిత్ ధోవల్, ఫ్రాన్స్ అధ్యక్షుడి దౌత్య సలహాదారు ఫిలిప్పె ఎటిన్నేతో మంగళవారం ఉదయం చర్చించారు.