గ్లాస్గో: కత్తితో దుండగుడి బీభత్సం.. ముగ్గురి మృతి, ఉగ్రవాద దాడేనా?

స్కాట్లాండ్‌లోని గ్లాస్గో నగరంలో దారుణం చోటు చేసుకుంది. ఓ దుండగుడు కత్తితో దాడి చేసి పలువురిని పొడిచాడు. ఈ ఘటనలో ముగ్గురు వ్యక్తులు మరణించగా.. మరో ఆరుగురు తీవ్రంగా గాయపడ్డారు. వారిని ఆస్పత్రికి తరలించి చికిత్స అందిస్తున్నారు. గ్లాస్గోలోని ప్రముఖ పార్క్ ఇన్ హోటల్‌లో స్థానిక కాలమానం ప్రకారం శుక్రవారం (జూన్ 26) మధ్యాహ్నం 2 గంటల సమయంలో ఈ ఘటన జరిగింది. పోలీసుల కాల్పుల్లో దుండగుడు హతమయ్యాడు. ఈ ఘటనను ఉగ్రవాద దాడిగా భావిస్తున్నారు. స్కాట్లాండ్ పోలీసులు దీన్ని ధ్రువీకరించాల్సి ఉంది.

దుండగుడి దాడిలో ఓ పోలీస్ ఆఫీసర్ కూడా తీవ్రంగా గాయపడ్డారు. ఆయణ్ని ఆస్పత్రికి తరలించి చికిత్స అందిస్తున్నట్లు అధికారులు తెలిపారు. ఘటన జరిగిన పార్క్ ఇన్ హోటల్‌ను పోలీసులు తమ ఆధీనంలోకి తీసుకున్నారు. అణువణువునా గాలిస్తున్నారు.

హోటల్‌లో బసచేస్తున్న పర్యాటకులే లక్ష్యంగా ఈ దాడి జరిగింది. శుక్రవారం మధ్యాహ్నం హోటల్‌లోకి ప్రవేశించిన దుండగుడు తన వద్ద ఉన్న కత్తి తీసి కనిపించిన వారినల్లా పొడిచేశాడు. హోటల్ రిసెప్షన్ గదిలో ఉన్న పలువురిపై దాడి చేశాడు. బాధితుల ఆర్తనాదాలతో హోటల్ గదుల్లో బస చేస్తున్న వారు ఒక్కసారిగా కిందకి పరుగెత్తుకొచ్చారు. రిసెప్షన్ గది రక్తసిక్తంగా మారడంతో భయభ్రాంతులకు గురయ్యారు. ఘటనకు సంబంధించిన పూర్తి వివరాలు తెలియాల్సి ఉంది.

Photo Credit: SNS

Also Read: ముంబై పేలుళ్ల కేసు దోషి జైలులో మృతి

Watch: లేహ్ పర్వతాల్లో ఫైటర్‌జెట్ల గర్జన.. సరిహద్దులో సైన్యం సై