Russia: పాఠశాలలో దుండగుడి కాల్పులు.. 9 మంది మృతి

రష్యాలో (Russia) ఓ పాఠశాలను లక్ష్యంగా చేసుకొని దుండగుడు కాల్పులకు పాల్పడ్డాడు. ఈ దుర్ఘటనలో 9 మంది మరణించినట్లు తెలుస్తోంది. కాల్పుల్లో మరో 20 మంది గాయపడ్డారు. మృతి చెందిన వారిలో విద్యార్థులు, టీచర్లు ఉన్నారు. సెంట్రల్ రష్యాలోని ఇజెవ్‌స్క్‌లో సోమవారం (సెప్టెంబర్ 26) ఉదయం ఈ ఘటన చోటు చేసుకుంది. పాఠశాలపై దాడి జరిగిన సమయంలో 1000 మంది విద్యార్థులు, 80 మంది టీచర్లు ఉన్నట్లు అధికారులు చెబుతున్నారు. ఘటనకు సంబంధించిన సమాచారం అందగానే భద్రతా దళాలు ఆ పాఠశాలను చుట్టుముట్టాయి. అక్కడి నుంచి విద్యార్థులు, టీచర్లందరినీ తరలించాయి. పాఠశాలను తమ ఆధీనంలోకి తీసుకున్నాయి.

ముఖానికి ముసుగు వేసుకొని వచ్చిన దుండగుడు తొలుత పాఠశాల గేట్ వద్ద ఉన్న గార్డును హత్య చేశాడు. ఆ తర్వాత పాఠశాలలోకి ప్రవేశించి విద్యార్థులపై విచక్షణా రహితంగా కాల్పులు జరిపాడు. ఆ సమయంలో క్లాసులు జరుగుతుండటంతో పాఠశాల గదులు కిక్కిరిసిపోయి ఉన్నాయి. కాల్పుల శబ్దం విని విద్యార్థులు, టీచర్లు బల్లల కింద దాక్కొని ప్రాణాలు రక్షించుకున్నారు.

గాయపడిన విద్యార్థిని తీసుకొని గదిలో దాక్కున్న ప్రధానోపాధ్యాయురాలు
గాయపడిన ఓ విద్యార్థిని తీసుకొని పాఠశాల ప్రధానోపాధ్యాయురాలు ఓ గదిలో దాక్కున్నారు. తరగతి గదులు రక్తపు మరకలతో భీతావహంగా మారిపోయాయి. విచక్షణా రహితంగా కాల్పులకు పాల్పడిన అనంతరం ఆ దుండగుడు నాలుగో అంతస్తుకు వెళ్లి తనను తాను కాల్చుకొని ఆత్మహత్య చేసుకున్నట్లు తెలుస్తోంది. ఈ మేరకు రష్యా మీడియా కథనాల్లో పేర్కొన్నారు. కాల్పుల్లో గాయపడిన వారిలో పలువురి పరిస్థితి విషమంగా ఉందని అధికారులు తెలిపారు.