రాంగ్ బటన్ నొక్కిన ఉద్యోగి.. వణికిన హవాయి ప్రజలు

‘మనకు బాలిస్టిక్ మిస్సైల్ ముప్పు పొంచి ఉంది. ఇది డ్రిల్ కాదు. మీరు బయట ఉంటే వెంటనే దగ్గర్లో ఉన్న ఇళ్లలోకి వెళ్లండి. కిటికీల పక్కన కూడా ఉండొద్దం’టూ.. మీ ఫోనుకు మెసేజ్ వస్తే..? వణికిపోవడం ఖాయం కదూ. సరిగ్గా ఇలాంటి పరిస్థితినే అమెరికాలో హవాయి ప్రజలు ఎదుర్కొన్నారు. అసలే ట్రంప్, కిమ్ మధ్య మాటల యుద్ధం సాగుతోంది. నా టేబుల్ మీదే అణు బాంబు రిమోట్ ఉందంటూ కిమ్ పిచ్చి వ్యాఖ్యలు చేస్తున్నాడు. వీటికి తోడు తమ రాష్ట్రం ఉత్తర కొరియా క్షిపణి పరిధిలోకి వస్తుంది. దీంతో తమకు ఇదే చివరి రోజని హవాయి ప్రజలు డిసైడయ్యారు. మరి కొద్దిసేపట్లో తమ ప్రాణాలు గాల్లో కలిసిపోవడం ఖాయమనే భావనకు వచ్చారు.

బాలిస్టిక్ క్షిపణి మన వైపు దూసుకు రాబోతోందని ప్రజల ఫోన్లకు సందేశాలు వెళ్లడంతోపాటు.. టీవీలు, రేడియోలు పదే పదే ఈ వార్తను ప్రసారం చేయడంతో జనం హడలిపోయారు. అది తప్పుడు వార్త అని 18 నిమిషాల తర్వాత ఈమెయిల్ వచ్చింది. కానీ ప్రజల ఫోన్లకు 38 నిమిషాల తర్వాతే ఆ విషయమై సందేశం అందింది. దీంతో వారు ఊపిరి పీల్చుకున్నారు.


మనకు మిస్సైల్ ముప్పేమీ లేదని అమెరికా ఆర్మీ స్పష్టం చేసింది. తప్పుడు సమాచారం వల్ల కలిగిన అసౌకర్యానికి క్షమించాలని గవర్నర్ డేవిడ్ ఇగ్ కోరారు. ఓ ఉద్యోగి ఒక బటన్‌ను నొక్కబోయి మరో బటన్‌ను నొక్కడంతో ఈ గందరగోళం తలెత్తిందని స్పష్టం చేశారు. స్థానిక కాలమానం ప్రకారం శనివారం ఉదయం జరిగిన ఈ ఘటనతో హవాయితోపాటు అమెరికా మొత్తం ఆందోళనకు గురైంది.