చైనా ‘పొరుగు’ మిత్ర దేశమేది? శత్రువెవరు?

భారత్‌తో కాకుండా చైనా 13 దేశాలతో సరిహద్దును పంచుకుంటోంది. వీటిలో పాకిస్థాన్ మాత్రమే ఆ దేశానికి బలమైన మిత్రదేశం కాగా.. ఆర్థిక అవసరాలు, అమెరికాతో విబేధాల కారణంగా రష్యా చైనాతో సఖ్యంగా ఉంటోంది. చైనాతో కలిసి ముందుకు నడిస్తేనే.. తాను అమెరికాను నిలువరించగలనని రష్యా భావిస్తోంది. అదే సమయంలో రష్యా మనకు మిత్రదేశం. ఇక అమెరికాతో ఎప్పుడూ కయ్యానికి కాలుదువ్వే ఉత్తర కొరియా చైనాతో మైత్రిని వెలగబెడుతోంది. అందుకే కొరియా ద్వీపకల్పంలో దక్షిణ కొరియాతో కలిసి అమెరికా చేపడుతున్న సైనిక విన్యాసాలు ఆపేయాలని చైనా కోరింది. మంగోలియాకు డ్రాగన్‌తో సంబంధాలు బాగోలేవు. ఇక కజకిస్థాన్, లావోస్, మయన్మార్ దేశాలు కూడా చైనాతో సఖ్యంగా ఉంటున్నవే.

కిర్గిస్థాన్, తజికిస్థాన్, ఆప్ఘానిస్థాన్‌లు తటస్థ వైఖరితో ఉంటున్నాయి. నేపాల్, భూటాన్‌లు మనకు మిత్రదేశాలు. దక్షిణ సముద్ర వివాదం నేపథ్యంలో వియత్నాంకు డ్రాగన్ అంటే గిట్టదు. మొదటి నుంచి జపాన్‌తో చైనా సంబంధాలు అంతంత మాత్రమే. తైవాన్, కంబోడియా, బ్రూనై దేశాలకు కూడా చైనా అంటే చిరాకే. సాగర జలాల్ని పంచుకుంటున్న దేశాల్లో ఒక్క మలేసియా మాత్రమే చైనా పట్ల తటస్థ వైఖరిని కనబరుస్తోంది.