Coronavirus Vaccine: త్వరలో కరోనాకు విరుగుడు.. ప్రపంచానికి డొనాల్డ్ ట్రంప్ గుడ్ న్యూస్

కరోనా వైరస్ ప్రపంచ దేశాలను కలవర పెడుతున్న వేళ అగ్రరాజ్యం కాస్త ఊరటనిచ్చే వార్త అందించింది. కరోనా వైరస్‌కు విరుగుడు వ్యాక్సిన్ కనుగొనే ప్రక్రియ సత్ఫలితాలను ఇచ్చే దశకు చేరుకున్నట్లు అమెరికా అధ్యక్షుడు డొనాల్డ్ ట్రంప్ ప్రకటించారు. హైడ్రాక్సీక్లోరోక్వినైన్, అజిత్రోమైసిన్ కలయితో కొత్త రూపొందిస్తున్న కొత్త వ్యాక్సిన్ కరోనాను నివారించే అవకాశం ఉందని వెల్లడించారు. ఈ ప్రాణాంతక వైరస్ అంతానికి హైడ్రాక్సీక్లోరోక్వినైన్ ప్రభావవంతంగా పనిచేస్తుందని వైద్య నిపుణులు ఇప్పటికే చెప్పారని ట్రంప్ గుర్తుచేశారు. అదే జరిగితే వైద్య చరిత్రలో అద్భుతం ఆవిష్కృతం అవుతుందని, గొప్ప మలుపు సాధ్యమవుతుందని ట్వీట్ చేశారు.

‘వైద్య చరిత్రలో అతిపెద్ద గేమ్ ఛేంజర్స్‌ అవతరణకు అవకాశం ఉంది. హైడ్రాక్సీక్లోరోక్వినైన్, అజిత్రోమైసిన్.. ఈ రెండింటి కలయికతో రూపొందే సరికొత్త ఔషధం సత్ఫలితాలను ఇస్తుందనే ఆశాభావం ఉంది. ఎఫ్‌డీఏ (ఫుడ్ అండ్ డ్రగ్ అడ్మినిస్ట్రేషన్) దీనిపై పరిశోధన కొనసాగిస్తోంది. అజిత్రోమైసిన్ కంటే హైడ్రాక్సీక్లోరోక్వినైన్ మంచి ఫలితాలను ఇస్తుందని ఇంటర్నేషనల్ జర్నల్ ఆఫ్ యాంటీ-మైక్రోబయాల్ ఏజెంట్స్ కూడా చెప్పారు. పరిశోధకులు ఈ రెండింటినీ వెంటనే వినియోగంలోకి తీసుకొస్తారనే విశ్వాసం ఉంది. జనం చచ్చిపోతున్నారు, వేగంగా చేయండి. గాడ్ బ్లెస్ ఎవ్రీవన్’ అని ట్రంప్ ట్వీట్ చేశారు.

ట్రంప్ చేసిన ట్వీట్‌కు అనూహ్య స్పందన వస్తోంది. కరోనా వైరస్‌కు విరుగుడు వస్తుందని నెటిజన్లు ఆశాభావం వ్యక్తం చేస్తున్నారు. కోవిడ్19పై ఉన్నతాధికారులతో డొనాల్డ్ ట్రంప్ శనివారం (మార్చి 21) అత్యున్నత స్థాయి సమావేశం ఏర్పాటు చేశారు. ఈ సమావేశం అనంతరం కీలక ప్రకటన చేసే అవకాశం ఉంది.

Also Read: కరోనా వాట్సాప్‌ హెల్ప్‌ డెస్క్‌: Hi చెప్పండి.. క్షణాల్లో రెస్పాన్స్

కరోనా వైరస్ వ్యాప్తి విషయంలో చైనాపై డొనాల్డ్ ట్రంప్ తీవ్ర విమర్శలు చేసిన విషయం తెలిసిందే. ఈ వైరస్‌ గురించి కొన్ని నెలల ముందే సమాచారం తెలిసి ఉంటే ప్రపంచవ్యాప్తంగా విస్తరించేది కాదని ఆయన వ్యాఖ్యానించారు. వైరస్‌ గురించి తమ వద్ద ఉన్న సమాచారాన్ని ప్రపంచ దేశాలకు తెలపడంలో చైనా విఫలమైందని ఆరోపించారు. అంతేకాదు, కరోనా తీవ్రతను ప్రపంచానికి తెలియనీయకుండా అడ్డుకున్న చైనా.. అక్కడి వైద్యులు, జర్నలిస్టులపై చర్యలు తీసుకుందని మండిపడ్డారు. ఇలా ఈ మహమ్మారి ప్రపంచవ్యాప్తంగా విస్తరించడానికి కారణమైన చైనా దీనికి బాధ్యత వహించాలని ఆయన పేర్కొన్నారు.

Watch: ఆ రాక్షసులకు ఉరి.. చిలుకూరులో రేపాసుర దహనం, ఇది నాలుగింతల దీపావళి