అత్యంత ధనిక దేశాల్లో ఇండియా నం.6

పేదలతో కూడిన అత్యంత ధనిక దేశం భారత్.. ఈ మాట ఇప్పటిది కాదు, దశాబ్దాల నుంచి వినిపిస్తూ ఉన్నదే. ఇక్కడ సంపద అంతా కొంతమంది చేతుల్లోనే బంధీ అయ్యింది. ఒకవైపు పొట్టకూటికి లేని పేదలు.. మరోవైపు కోట్లకు పడగలెత్తిన శ్రీమంతులు. వీళ్ల కలయికే భారతదేశం. ఆకలిచావుల విషయంలో ముందుండే భారతదేశం.. ఆగర్భశ్రీమంతుల విషయంలోనే ముందే ఉంది. తాజాగా ఈ విషయాన్ని స్పష్టం చేస్తూ మరో సర్వే వెల్లడైంది.

ప్రపంచంలోని అత్యంత సంపన్నమైన పది దేశాల్లో ఒకటిగా నిలిచింది భారతదేశం. ఈ జాబితాలో తొలి స్థానంలో అమెరికా ఉండగా.. ఆరో స్థానంలో ఇండియా ఉంది. రెండో స్థానంలో చైనా, మూడో స్థానాన్ని జపాన్ ఆక్రమించింది. ఆ తర్వాత బ్రిటన్, జర్మనీ, ఫ్రాన్స్,కెనడా, ఆస్ట్రేలియా, ఇటలీలు ఉన్నాయి.

ప్రైవేట్ వ్యక్తుల ఉన్న అన్ని రకాల సంపద విలువను అంచనా వేస్తూ ఈ సర్వే సాగింది. ప్రభుత్వ ఆస్తులను, ఫండ్స్ ను పక్కన పెట్టి కేవలం వ్యక్తుల వద్ద ఉన్న సంపదను మాత్రమే గణించారు. ఈ లెక్క ప్రకారం.. మన దేశంలోని వ్యక్తుల వద్ద ఉన్న మొత్తం సంపద విలువ 5.23 కోట్ల కోట్లు.

మన దేశంలో కనీసం పది లక్షల రూపాయల విలువైన నికర ఆస్తులు కలిగిన వారి సంఖ్య మూడు లక్షల ముప్పై వేలకుపైనే ఉంది. కోటీశ్వరుల సంఖ్య ఇరవై వేలకు పైగా ఉంది. వంద కోట్లకు పైగా ఆస్తులు కలిగిన వారి సంఖ్య 119 వరకూ ఉంది. అమెరికాలో పది లక్షల రూపాయల విలువకు పైగా ఆస్తులు కలిగిన వారి సంఖ్య యాభై లక్షల వరకూ ఉంది.