Suella Braverman: యూకే మంత్రి వీసా కామెంట్స్‌పై.. గట్టి కౌంటర్ ఇచ్చిన భారత్

యూకే హోంశాఖ మంత్రి సుయెల్లా బ్రేవర్మన్ (Suella Braverman).. భారతీయులపై చేసిన వ్యాఖ్యలకు భారత్ స్ట్రాంగ్ కౌంటర్ ఇచ్చింది. వీసా పరిమితి దాటిన తర్వాత కూడా బ్రిటన్‌లో ఉంటోన్న భారతీయులను ఉద్దేశించి.. ఆమె వివాదాస్పద వ్యాఖ్యలు చేశారు. గత ఏడాది రెండు దేశాల మధ్య జరిగిన మైగ్రేషన్ అండ్ మొబలిటీ పార్టనర్‌షిప్ (MMP) ఆశించిన స్థాయిలో పనిచేయడం లేదని సుయెల్లా అన్నారు. దీనిపై భారత్ అంతేస్థాయిలో రియాక్ట్ అయింది.

ఒప్పందం కింద లేవెనత్తిన అన్ని అంశాలపై చర్యలు ప్రారంభించామని లండన్‌లో భారత హైకమిషన్ వెల్లడించింది. ఒప్పందంలో భాగంగా యూకే వైపు నుంచి సైతం స్పందన కోసం తాము ఎదురుచూస్తున్నామని తెలిపింది. "మైగ్రేషన్, మొబిలిటీ కింద మా విస్తృత చర్చల్లో భాగంగా యూకేలో వీసా వ్యవధిని దాటిన భారతీయ పౌరులు తిరిగి స్వదేశానికి రప్పించేందుకు వీలుగా యూకే ప్రభుత్వంతో కలసి పనిచేయడానికి భారత ప్రభుత్వం కట్టుబడి ఉంది. హైకమిషన్‌కు సూచించబడిన అన్ని కేసులపై చర్య ప్రారంభించాం." అని భారత హైకమిషన్ పేర్కొంది.

అలాగే ఎంఎంపీ ఒప్పందంలో భాగంగా హామీలను నెరవేర్చేందుకు యూకే చర్యలు చేపట్టినట్టు తెలుస్తుందని, అయితే వాటిలో సరైన పురోగతి కోసం చూస్తున్నామని లండన్‌లో భారత్ హైకమిషన్ వెల్లడించింది. కాగా ఇరు దేశాల మధ్య చర్చల్లో ఉన్న ప్రతిపాదిత స్వేచ్ఛా వాణిజ్య ఒప్పందంపై వీసా సంబంధిత రిజర్వేషన్లపైనా సుయెల్లా మాట్లాడిన మాటలు దుమారాన్ని రేపాయి. ఈ మేరకు వలసలకు సంబంధించిన అంశాలపై చర్చలు జరుగుతున్నందున వాటిపై కామెంట్ చేయడం సరైనది కాదని భారత కమిషన్ అభిప్రాయపడింది.