భారత్ ఆర్థికవృద్ధిపైనే దృష్టి సారించింది: చైనా పత్రిక

చైనాతో పోల్చుకుంటే భారత్‌లో విమాన వాహక నౌకల నిర్మాణం నత్తనడకగా సాగుతోందంటూ ఆ దేశ అధికార పత్రిక ఓ కథనాన్ని ప్రచురించింది. భారత్ ఆర్థికాభివృద్ధిపైనే దృష్టి కేంద్రీకరించిందని, విమాన వాహక నౌకల నిర్మాణానికి ఆసక్తి చూపడం లేదని పేర్కొంది. భారత్‌లో పారిశ్రామికీకరణ ఇప్పటికీ ప్రారంభ దశలోనే ఉందని, యుద్ధ నౌకల నిర్మాణంలో సాంకేతికపరమైన అనేక అడ్డంకులు ఉన్నాయని ఈ రోజు ప్రచురించిన సంపాదకీయంలో గ్లోబల్ టైమ్స్ వెల్లడించింది. గత కొన్ని దశాబ్దాలుగా భారత్, చైనాలు వివిధ రకాల యుద్ధ నౌకల నిర్మాణం చేపట్టాయని, ఆర్థికాభివృద్ధికి వల్ల ఫలితాలు కూడా విభిన్నంగా వచ్చాయని తెలిపింది.

ఆర్థికంగా బలంగా ఉండటంతో హిందూ మహా సముద్రంలో విమాన వాహక నౌకల నిర్మాణంలో భారత్‌ కంటే చైనా మంచి పురోగతి సాధించిందని వ్యాఖ్యానించింది. చైనా నేవీ ఏర్పాటు చేసి 68 ఏళ్లు పూర్తయి సందర్భంగా ఆ దేశం ఘనంగా వేడుకలు నిర్వహించింది. ఈ సందర్భంగా ఆసియా, ఐరోపా, ఆఫ్రికా ఖండాల్లోని 20 దేశాల్లో స్నేహపూర్వక పర్యటన కోసం మూడు యుద్ధ నౌకలు చైనా నుంచి బయలుదేరాయి. విదేశీ వాణిజ్యాన్ని విస్తరించేందుకు, ఒన్ బెల్ట్ అండ్ ఒన్ రోడ్ పాలసీపై విస్తృత‌ ప్రచారం, రక్షణకు చైనా నేవీ కొత్త ప్రయోగానికి శ్రీకారం చుట్టుందని అధికార పత్రిక తెలియజేసింది.

విదేశాల్లో తన ఉనికిని చాటుకోడానికి నౌకాదళం కోసం సైనిక వ్యూహం మార్చుకుందని భద్రత నిపుణుడు షాంగ్ జింగ్‌పింగ్ వ్యాఖ్యానించారు. రష్యాకు చెందిన ఖాళీ నౌకపై నిర్మించిన లియోనింగ్ యుద్ధ విమాన వాహక నౌక, ఇప్పటికే నీలి సముద్రంలో శిక్షణ పూర్తిచేసుకుందని ఆయన అన్నారు. పాకిస్థాన్‌లోని గ్వాదర్ పోర్టులో సరుకు రవాణా కోసం ఇప్పటికే భారీగా వెచ్చించింది. ప్రపంచంలో రెండో అతిపెద్ద ఆర్థిక వ్యవస్థ కలిగిన చైనా నౌవికా దళం ద్వారా రక్షణ కోసం మరింత ఎక్కువ ఖర్చు చేస్తోందని తెలిపింది.