ఇరాన్ బేబీకి అమెరికాలో ఉచిత సర్జరీ

గుండె సంబంధిత వ్యాధితో బాధపడుతున్న ఇరాన్ చిన్నారికి సాయం చేసేందుకు ముందుకు వచ్చింది అమెరికా ప్రభుత్వం. ఇరాన్ దేశస్తురాలైన నాలుగు నెలల చిన్నారికి అత్యవసరంగా హార్ట్ సర్జరీ చేయాల్సి ఉంది. అది కూడా అమెరికాలోని న్యూయార్క్ లో. ఆమె తల్లిదండ్రులకు అంత స్థోమత లేకపోవడంతో దాతలు విరాళాల రూపంలో డబ్బును సమకూర్చారు. తల్లిదండ్రులు పర్యాటక వీసా తీసుకుని పాపని న్యూయార్క్ తీసుకెళ్లే ఏర్పాటు చేశారు. వారి ప్రయాణానికి ముందు ట్రంప్ ప్రభుత్వం ఏడు ముస్లిం దేశాలపై నిషేధం విధించారు. ఆ దేశస్థులను అమెరికాలో మూడు నెలల పాటూ అడుగుపెట్టనివ్వొద్దని నిర్ణయించారు. ఆ దేశాల జాబితాలో ఇరాన్ కూడా ఉంది.

దీంతో చిన్నారి తల్లిదండ్రులను విమానం ఎక్కనివ్వలేదు సిబ్బంది. పాప ఆరోగ్య పరిస్థితి గురించి అమెరికా అధికారులకు తెలిసింది. తద్వారా న్యూయార్క్ గవర్నర్ ఆండ్రూ క్యూమోకు తెలిసింది. అతను ఎమెర్జెన్సీ ప్రొసీజర్ ద్వారా పాపను అమెరికాలోని వచ్చేందుకు అనుమతి ఇచ్చారు. పాపకు న్యూయార్క్‌లోని మౌంట్ సినాయ్ ఆసుపత్రిలో శుక్రవారం సాయంత్రం గుండెకు ఆపరేషన్ జరగనుంది. ఆపరేషన్ కు ఎలాంటి రుసుము వసూలు చేయడం లేదని క్యూమో తెలియజేశారు.