అమెరికా అధినేతపై బాంబ్ పేల్చిన జేమ్స్ కామే!

అమెరికా అధ్యక్షుడు డొనాల్డ్ ట్రంప్‌కు.. ఎఫ్‌బీఐ డైరెక్టర్‌ జేమ్స్‌ కామేను పదవీ నుంచి తొలగించటం పెద్ద తలనొప్పిగా మారింది. తనను అకస్మాత్తుగా తొలగించడమే కాకుండా తప్పు చేసినట్లు చిత్రీకరించే ప్రయత్నాలను కామే ఎండగట్టాడు. తాజాగా ఈ ఎఫ్‌బీఐ మాజీ డైరెక్టర్‌ తనకు - అధ్యక్షుడికి మధ్య జరిగిన సంభాషణలన్నింటినీ బట్టబయలు చేశాడు. అధ్యక్ష ఎన్నికల్లో రష్యా జోక్యం ఉందని తెగేసి చెప్పాడు. సెనేట్‌ సెలెక్ట్‌ కమిటీ ఆన్‌ ఇంటెలిజెన్స్‌ ముందు ఆయన ఆసక్తికర వివరాలు వెల్లడించాడు. దీంతో ట్రంప్‌ తన విశ్వసనీయతను కోల్పోయే ప్రమాదం ఏర్పడింది.

‘అమెరికా అధ్యక్ష ఎన్నికల్లో.. రష్యా పాత్రపై విచారణ కారణంగానే నన్ను పదవి నుంచి తొలగించారు’ అని జేమ్స్‌ కామే.. సెనేట్‌ సెలెక్ట్‌ కమిటీ ముందు తెలిపాడు. నన్ను తొలగించిన అనంతరం నా పరువు, ఫెడరల్‌ బ్యూరో ఆఫ్‌ ఇన్వెస్టిగేషన్‌ ప్రతిష్ట మంటగలిసేలా ట్రంప్‌ బృందం ప్రచారం చేపట్టింది అని ఆయన ఆరోపించాడు.

‘2016 ఎన్నికల్లో రష్యా జోక్యం చేసుకుంది. ఒక లక్ష్యం కోసమే వాళ్లు ఈ పని చేశారు. ఇందు కోసం టెక్నాలజీ ఉపయోగించారు’ అని కామే చెప్పాడు. ట్రంప్‌తో ప్రతి సమావేశం వివరాలను భద్రపరిచానని, ఆ తర్వాత ఆయన అబద్ధాలు చెప్పే అవకాశం ఉందనే అనుమానంతోనే ఇలా చేశానని ఆయన వెల్లడించాడు. ఈ వివరాలన్నింటినీ మిత్రుడి ద్వారా పత్రికలకు పంపించానని కామే తెలిపాడు.

డొనాల్డ్‌ ట్రంప్‌.. స్వయంగా తానే జేమ్స్‌ కామేను ఎఫ్‌బీఐ డైరెక్టర్‌‌గా ఎంచుకోవడం గమనార్హం. అతడు ఆ పదవి చేపట్టే సందర్భంలో ‘మీ నుంచి విధేయతను ఆశిస్తున్నా’ అని ట్రంప్ చెప్పారు. చివరికి బలమైన కారణం లేకుండానే కామేను తొలగించారు. ఇప్పుడు ఈ ఉదంతం అధ్యక్ష పీఠానికే ఎసరు తెచ్చేలా ఉంది.