Brazil Rains: బ్రెజిల్‌లో వరదలు.. 31 మంది మృతి

బ్రెజిల్‌లో భారీ వర్షాలు పడుతున్నాయి. వరదలు ముంచెత్తుతున్నాయి. (Brazil Rains) దాంతో వాగులు, వంకలు పొంగిపొర్లుతున్నాయి. అక్కడ వరదల కారణంగా 31 మంది ప్రాణాలు కోల్పోయారు. ఈశాన్య బ్రెజిల్లో పెర్నాంబుకో రాష్ట్రంలో కొండచరియలు విరిగిపడ్డాయి. ఈ ఘటనలో 29 మంది చనిపోయారు. అలాగే అలాగోస్‌లో శుక్రవారం ఇద్దరు వ్యక్తులు వరదల్లో కొట్టుకుపోయారు. పెర్నాంబుకోలో వరదల కారణంగా వెయ్యి మందికిపైగా ప్రజలు నిర్వాసితులయ్యారు. వారంతా తమ ఇళ్లను విడిచిపెట్టి బయటకు వెళ్లాల్సి వచ్చింది.

రాష్ట్రంలో దాదాపు 32,000 కుటుంబాలు వరద ప్రభావిత ప్రాంతాల్లో చిక్కుకుపోయారు. వరదల్లో ఇళ్లను, గూడును కోల్పోయిన నిర్వాసితులను స్థానిక అధికారులు రెసిఫ్ నగరంలో పాఠశాల భవనాలకు తరలించారు. ఇక అలగోస్‌లో భారీ వర్షాల ప్రభావం కారణంగా 33 మునిసిపాలిటీలు అత్యవసర పరిస్థితిని ప్రకటించాయని రాష్ట్ర ప్రభుత్వం తెలిపింది. వరదల్లో చిక్కుకున్న వారికి సహాయం చేయడానికి సాయుధ దళాల బృందాలను పంపనున్నట్టు ఆ దేశ అధ్యక్షుడు జైర్ బోల్సోనారో ట్విట్టర్‌లో తెలిపారు.

కాగా దక్షిణ నైజీరియాలో తొక్కిసలాట కారణంగా 31 మంది చనిపోయారు. చర్చిలో జరిగే కార్యక్రమంలో భాగంగా ఆహారం కోసం వందలాది మంది ప్రజలు చర్చ్ గేటు దగ్గర క్యూలో నిలబడ్డారు. అయితే అందులో కొందరు అసహనానికి గురై ఒక్కసారిగా గేటును కూల్చి లోపలకి ప్రవేశించారు. ఈ క్రమంలో పదుల సంఖ్యలో ప్రజలు ప్రాణాలు కోల్పోయారు. చనిపోయిన వారిలో ఎక్కవగా చిన్నపిల్లలే ఉన్నారు.