విమానంలో యువకుడి అసభ్య ప్రవర్తన.. దుస్తులు విప్పేసి ఎయిర్ హోస్టెసుపై దాడి

మలేషియా ఎయిర్ లైన్సుకు చెందిన ఓ విమానంలో బంగ్లాదేశ్ యువకుడు అసభ్యంగా ప్రవర్తించిన ఘటన వెలుగులోకి వచ్చింది. మలేషియన్ యూనివర్సిటీలో విద్యాభ్యాసం చేస్తున్న 20 ఏళ్ల ఆ యువకుడు విమానంలో ప్రయాణిస్తున్నప్పుడు తన దుస్తులను విప్పేసి, ల్యాపుటాప్ ఓపెన్ చేసి పోర్న్ వీడియోలు చూశాడు. అతణ్ని అడ్డుకోవడానికి ప్రయత్నించిన ఎయిర్ హోస్టెన్లు, ఇతర సిబ్బంది పట్ల అసభ్యంగా ప్రవర్తించాడు. క్యాబిన్ సిబ్బంది, కొంత మంది ప్రయాణీకులు కలిసి అతడి చేతులను కట్టేసి నిర్బంధంలోకి తీసుకున్నట్లు మలేషియా ఎయిర్ లైన్స్ తెలిపింది.

విమానం కౌలాలంపూర్ నుంచి ఢాకా వెళుతుండగా సదరు యువకుడు ఇలా వింతగా ప్రవర్తించాడు. విమానం ఢాకాకు చేరుకోగానే అతణ్ని అరెస్ట్ చేసినట్టు మలేషియా ఎయిర్ లైన్స్ వెల్లడించింది. ఘటనకు సంబంధించిన పూర్తి వివరాలు తెలియాల్సి ఉంది.