ట్రంప్‌కి వ్యతిరేకంగా శాస్త్రవేత్తల నిరసన ప్రదర్శనలు!

అమెరికా అధ్యక్షుడు డొనాల్డ్ ట్రంప్ నిర్ణయాలను వ్యతిరేకిస్తూ వేలాదిగా శాస్త్రవేత్తలు ప్రపంచ ధరిత్రి దినోత్సవం సందర్భంగా వీధుల్లోకి వచ్చి నిరసన తెలిపారు. నిరంతరం పరిశోధనల్లో మునిగి తేలే శాస్త్రవేత్తలు రోడెక్కడం ట్రంప్ తీరుపై దుమారమే రేపుతోంది. పరిశోధనల పట్ల చిన్నచూపు చూడటం, సైన్స్‌కు ఇచ్చే నిధుల్లో కోత విధించడం, శాస్త్రవేత్తలపై పెత్తనం, నియామకాల్లో రాజకీయాల జోక్యాన్ని నిరసిస్తూ ప్రపంచ వ్యాప్తంగా 500 నగరాల్లో వేలాది మంది పరిశోధకులు ప్రదర్శనలు చేపట్టారు. తమకు మరింత స్వేచ్ఛ, భద్రత కల్పించాలని వారు డిమాండ్ చేశారు. ట్రంప్ అధ్యక్షుడిగా బాధ్యతలు చేపట్టిన తర్వాత పెను మార్పులు చోటుచేసుకున్నాయి. పరిశోధన నిర్ణయాల్లో శాస్త్రవేత్తలకు కూడా భాగస్వామ్యం కల్పించడం లేదు.

అంతే కాకుండా పరిశోధనలకు కేటాయించే నిధుల్లో కోత విధించడం, వాతావరణ మార్పులకు సంబంధించిన అంశాలకు ప్రాధాన్యత ఇవ్వడం లేదని ఆరోపిస్తూ పెద్ద ఎత్తున నిరసన ప్రదర్శనలు నిర్వహించారు. ట్రంప్ అధ్యక్షుడిగా ఎన్నికైన తర్వాత వైట్‌హౌస్ వెబ్‌సైట్‌లో వాతావరణ మార్పులకు సంబంధించిన అంశాలను పూర్తిగా తొలగించారు. అలాగే మాజీ అధ్యక్షుడు ఒబామా వాతావరణ మార్పులపై చేసిన ప్రసంగాలను కూడా తొలగించారు. ఈ చర్యలను వ్యతిరేకిస్తూ టెక్సాస్ యూనివర్సిటీకి చెందిన హెల్త్ సైన్సెస్‌ పరిశోధకుడు జొనాథన్ బెర్మన్ ఇచ్చిన పిలుపు మేరకు ప్రపంచవ్యాప్తంగా లక్షలాదిమంది శాస్త్రవేత్తలు మార్చ్ నిర్వహించారు.

Marches for Science Outdraw Donald Trump's Inauguration via @politicususa https://t.co/aWjJgV7azy — Gabrielle Shatan (@GabrielleShatan) April 23, 2017
వాషింగ్టన్‌, లండన్‌, జెనీవా, బెర్లిన్, శాన్‌ఫ్రాన్సిస్కో. మనహట్టన్ సహా వివిధ నగరాల్లో నిరసన ప్రదర్శనలు జరిగాయి. వాతావరణ మార్పులపై డైనోసారోలకు నమ్మకం లేదంటూ ట్రంప్‌‌ను వ్యతిరేకిస్తూ నినాదాలు చేశారు. ట్రంప్ అంతర్జాతీయ హోటల్, టవర్ ముందు నుంచి నిరసన ప్రదర్శన సాగుతుండగా దెయ్యం, సిగ్గు... సిగ్గు... మహాభియోగం ద్వారా ట్రంప్ పదవి నుంచి తప్పుకునే సమయం వచ్చిదంటూ పెద్దగా అరుస్తూ అందులో పాల్గొన్నవారు నినదించారు.

ముఖ్యమైన ఆవిష్కరణల కోసం బడ్జెట్‌లో నిధులకు కోత విధించారు...దీని వల్ల బయోమెడికల్ పరిశోధనకు సంబంధించి సాంకేతికంగా ఆటంకం కలుగుతోందని మౌంట్ సినాయ్ హాస్పిటల్‌ సీనియర్ కణ-విభజన పరిశోధకుడు డాక్టర్ జిల్ డ్వోర్ణిక్ అన్నారు. అమెరికాలో శాస్త్రవేత్తల ప్రదర్శనకు ఆస్ట్రేలియా, బ్రెజిల్ నుంచి మద్దతు లభించింది.