నేపాల్ ప్రధాని కేపీ ఓలీ రాజీనామా !

నేపాల్ లో మళ్లీ రాజకీయ అనిశ్చితి నెలకొంది. రాజరిక పాలనకు స్వస్తి చెప్పి ఇప్పుడిప్పుడే ప్రజాస్వామ్య బాట పడుతున్న ప్రభుత్వానికి అకస్మాత్తుగా ఎదురుదెబ్బ తగిలింది. సంకీర్ణ ప్రభుత్వానికి మద్దతిస్తున్న పార్టీలు ఉన్నట్టుండి మద్దతును ఉపసంహరించుకోవడంతో ఆ దేశ ప్రధాని కేపీ ఓలీ తన పదవికి రాజీనామా చేశారు. ప్రధాని నియంతృత్వ పోకడలకు పోతున్నారని ఆరోపిస్తూ నేపాలి కాంగ్రెస్, మావోయిస్టు పార్టీలు ప్రభుత్వానికి తమ మద్దతు ఉపసంహరించుకుని అవిశ్వాస తీర్మానం ప్రతిపాదించాయి. ఈ అవిశ్వాస తీర్మానికి ప్రభుత్వానికి కీలక మద్దతుదారులైన రైట్స్ ఫోరమ్ -డెమోక్రటిక్, రాష్ట్రీయ ప్రజాతంత్ర పార్టీలు మద్దతు తెలిపాయి. దీంతో మెజార్టీ లేనందున ప్రధాని పదవికి కేపీ ఓటీ రాజీనామా చేయాల్సి వచ్చింది.

అక్టోబర్ 2015లో కేపీ ఓలీ నేపాల్ ప్రధానిగా బాధ్యతలు స్వీకరించిన విషయం తెలిసిందే. అప్పటి నుంచి ఆయన తుమ్మితే ఊడిపోయే ముక్కలాంటి ప్రభుత్వాన్ని ఎలాగోలా నెట్టకొచ్చారు. కానీ ఆయన వైఖరి నచ్చలేదనే కారణంతో మిత్ర పక్షాలు ఆ పార్టీకి మద్దుతు ఉపసంహరించుకోవడంతో కేపీ ఓలీ ప్రభుత్వం ఒక్కసారిగా కుప్పకూలింది.

ప్రధాని కేపీ ఓలీ ఏ విషయంలోనూ తమకు సంప్రదించడం లేదని.. అన్ని ఏకపక్ష నిర్ణయాలు తీసుకుంటున్నారని నేపాల్ కాంగ్రెస్ పార్టీ ఆరోపించింది. ప్రజాస్వామ్యంలో నియంతృత్వానికి తావులేదని అందుకే తాము సంక్షీర్ణ ప్రభుత్వానికి మద్దతు ఉపసంహరించుకుంటున్నామని ఆ పార్టీ ప్రకటించింది. ఈ సందర్భంగా కేపీ ఓలీ మాట్లాడుతూ భారత్ -చైనాతో సంబంధాలను మెరుగుపరిచేలా కృషి చేసినందుకే నేపాలి కాంగ్రెస్, మావోయిస్టు పార్టీలు తమ ప్రభుత్వంపై కుట్ర పన్ని కూల్చేశాయని ఆరోపించారు.