పోలీసుల కస్టడీలో న్యూయార్క్ పేలుడు నిందితుడు

న్యూయార్క్, న్యూజెర్సీల్లో బాంబు పేలుళ్లు, కొన్ని చోట్ల పేలని బాంబులు దొరికిన ఘటనలకు బాధ్యుడుగా అనుమానిస్తున్న అహ్మద్ ఖాన్ రహామీ (28) అనే యువకుడిని యూఎస్ పోలీసులు కస్టడీలోకి తీసుకున్నారు. ఇతని జాడ కోసం అమెరికా దర్యాప్తు సంస్థ ఎఫ్‌బీఐ తీవ్రంగా గాలిచింది. ఈ క్రమంలో లిండన్ ప్రాంతంలో కనిపించిన ఇతన్ని అక్కడ ఉన్న ఇద్దరు పోలీసులు కాల్పులు జరిపి అదుపులోకి తీసుకున్నారు. ఆఫ్ఘనిస్థాన్ జాతీయుడైన రహామీ అమెరికా పౌరసత్వం తీసుకొని ఎలిజబెత్‌ లో నివసిస్తున్నాడు. రెండురోజుల్లో జరిగిన ఘటనలతో రహామీకి సంబంధం ఉన్నదని తెలిపే ఆధారాలు లభించాయని దర్యాప్తు వర్గాలు వెల్లడించాయి. ఆదివారం బాంబు పేలుడు జరిగిన మాన్‌హట్టన్‌ లోని చెల్సియాలో రహామీ సంచరించినట్లు సీసీ కెమెరాల్లో రికార్డు అయింది. కాగా సోమవారం న్యూజెర్సీలోని ఎలిజబెత్ రైల్వేస్టేషన్ వద్ద ఐదు బాంబులు లభించాయి. వాటిని పరీక్షించే సమయంలోబాంబుల్లో ఒకటి పేలింది. అయితే ఎవరూ గాయపడలేదు. న్యూజెర్సీలో ఇలాంటి ఘటన జరగడం రెండు రోజుల్లో ఇది రెండోసారి.