ఒక్క కరోనా కేసు.. వారం రోజులు లాక్‌డౌన్

క‌రోనా వైరస్ నియంత్రణలో న్యూజిలాండ్ ఏవిధంగా వ్యవహరించిందో అందరికీ తెలుసు. ఈ వైర‌స్ వ్యాప్తిని స‌మ‌ర్థంగా అడ్డుకొని ప్రపంచ దేశాల మన్ననలు అందుకుంది. తాజాగా న్యూజిలాండ్‌లో అతి పెద్ద న‌గ‌ర‌మైన ఆక్లాండ్‌లో ఒక క‌రోనా కేసు న‌మోదైంది. దీంతో అక్కడ లాక్‌డౌన్ విధిస్తున్నట్లు ప్రకటించారు. ఆదివారం (ఫిబ్రవరి 28) నుంచి ఆ న‌గ‌రంలో వారం రోజుల పాటు లాక్‌డౌన్ అమల్లో ఉంటుందని న్యూజిలాండ్ ప్రధాని జెసిండా ఆర్డర్న్ పేర్కొన్నారు.

ఆక్లాండ్‌లో ఇటీవలే యూకే వేరియంట్ కరోనా వైరస్‌ను గుర్తించారు. అక్కడ ముగ్గురిలో యూకే రకం కరోనా వైరస్ నిర్ధారణ అయింది. దీంతో 3 రోజుల పాటు లాక్‌డౌన్ విధించారు. తాజాగా మరో కేసు వెలుగులోకి రావడంతో వారం రోజుల పాటు లాక్‌డౌన్ విధించారు..

ఆక్లాండ్‌లో వారం రోజుల లాక్‌డౌన్ విధించిన ప్రధాని జెసిండా.. దేశంలోని ఇతర ప్రాంతాల్లో లెవ‌ల్ 2 ఆంక్షలు ఉంటాయ‌ని తెలిపారు. అంటే ఎక్కువ మంది గుమిగూడే అవకాశమున్న అన్ని రకాల కార్యక్రమాలపై నిషేధం ఉంటుందన్నమాట. అటు బ్రెజిల్ రాజ‌ధాని బ్రెజిలియాలోనూ 24 గంట‌ల పాటు లాక్‌డౌన్ విధించారు.