ఐరాసలో అమెరికా రాయబారి నిక్కీ హేలీ రాజీనామా

అమెరికా అధ్యక్షుడు డోనాల్డ్ ట్రంప్‌ కార్యవర్గం నుంచి మరో కీలక వ్యక్తి వైదొలిగారు. ఐక్యరాజ్యసమితిలో అమెరికా రాయబారి నిక్కీ హేలీ తన పదవికి రాజీనామా చేశారు. హేలీ రాజీనామాపై అధ్యక్షుడు ట్రంప్ స్పందించారు. ‘ఆరు నెలల ముందుగానే నిక్కీ హేలీ తన రాజీనామా విషయాన్ని నాతో చర్చించారు. అయితే అందుకు కాస్త సమయం తీసుకోమని సలహాఇచ్చాను. హేలీ రాజీనామాకు ఆమోదం తెలిపానని’ ట్రంప్ అన్నారు.

అద్భుతంగా విధులు నిర్వహించారని ఓవల్ ఆఫీసులో హేలీని ప్రశంసించినట్లు ట్రంప్ వెల్లడించారు. ఈ ఏడాది చివరివరకూ పదవిలో కొనసాగాలని హేలీకి సూచించినట్లు ట్రంప్ పేర్కొన్నారు. ‘నా స్నేహితురాలు, మా దౌత్యవేత్త నిక్కీ హేలీ ఓవల్‌ ఆఫీస్‌లో కీలక ప్రకటన చేయనున్నారు. ఆ తర్వాత పూర్తి వివరాలు తెలుస్తాయంటూ’ కొన్ని గంటలకు ముందే ట్రంప్ హెలీ రాజీనామాపై పరోక్షంగా సంకేతాలిచ్చారు.

కాగా, 2020 అమెరికా అధ్యక్ష ఎన్నికల్లో డోనాల్డ్ ట్రంప్‌నకు వ్యతిరేకంగా తాను బరిలో దిగాలని భావించడం లేదని నిక్కీ హేలీ అన్నారు. ట్రంప్ కోసం వచ్చే అధ్యక్ష ఎన్నికల్లో ఆయన తరఫున ప్రచారంలో పాల్గొంటానని ఆమె స్పష్టం చేశారు. 2010లో సౌత్ కరోలినా గవర్నర్‌గా నిక్కీ హేలీ ఎన్నికై తన బాధ్యతలు నిర్వర్తించారు. 2016 అధ్యక్ష ఎన్నికల్లో ట్రంప్‌నకు వ్యతిరేకంగా మాట్లాడారు. వలసదారులపై ఆయన తీవ్ర చర్యలు తీసుకుంటారంటూ అమెరికన్లను హెచ్చరించారు. అయినా ఆమెను ట్రంప్ అమెరికా రాయబారిగా బాధ్యతలు అప్పగించారు.